პოლიტიკურმა პარტიამ „სალომე ზურაბიშვილი-საქართველოს გზა“ დავით გარეჯის სამონასტრო კომპლექსის ტერიტორიასთან დაკავშირებით შექმნილი ვითარება  დღეს საგარეო საქმეთა სამინისტროს წინ გამართულ ბრიფინგზე გააპროტესტა.
პარტიის საერთაშორისო მდივანმა თეიმურაზ მურვანიძემ უპასუხისმგებლო და არაკომპეტენტური უწოდა მინისტრის მოადგილის ნინო კალანდაძის განცხადებას გარეჯის ტერიტორიის აზერბაიჯანის კუთვნილების შესახებ.
„ასეთი უპასუხისმგებლო და არაკომპეტენტიური განცხადებები მძიმე დარტყმაა ქვეყნის სასიცოცხლო ინტერესებისთვის. მსგავსმა ანტისახელმწიფოებრივმა გამონათქვამებმა დიდი ზიანი მიაყენა ქვეყანას. ფაქტობრივად, ხელისუფლებამ წერტილი დაუსვა აზერბაიჯანთან ამ თემაზე მოლაპარაკებებს, რომელზეც, წლების განმავლობაში, ორი სადავო საკითხი - დავით გარეჯი და წითელი ხიდი განიხილებოდა“-აღნიშნა მურვანიძემ.
მისი თქმით, პარტიამ არაერთხელ ამხილა ხელისუფლება უუნარობაში - დაიცვას ქვეყნის საზღვრები და მოითხოვა „მცოცავი ანექსიის“ შეჩერება.
„სალომე ზურაბიშვილი-საქართველოს გზამ“ ბრიფინგის შემდეგ საგარეო საქმეთა სამინისტროში ოფიციალური წერილი შეიტანა და ამ საკითხებთან დაკავშირებით განმარტებები ითხოვა.
გავრცელებული ინფორმაციით, 6 მაისიდან გარეჯის მონასტერში აზერბაიჯანელი მესაზღვრეები ჩადგნენ და ტაძარში მომლოცველებსა და ტურისტებს არ უშვებენ. ამ ფაქტთან დაკავშირებით მონასტერში მოღვაწე ბერებმა დაუყოვნებლივ აცნობეს საგარეო საქმეთა სამინისტროს და საკითხის გარკვევა და მოგვარება სთხოვეს.
ნინო კალანდაძის განცხადებით, მიუხედავად იმისა, რომ საქმე ეხება აზერბაიჯანის მონაკვეთს, საგარეო პოლიტიკური უწყება ამ პრობლემას თვალს მაინც ადევნებს. მისი განმარტებით, აზერბაიჯანულ მხარესთან აქტიურად მიმდინარეობს საზღვრის დელიმიტაციის საკითხზე მუშაობა. ამ საკითხს სპეციალურად შექმნილი სამუშაო ჯგუფები არკვევენ. მოლაპარაკება აზერბაიჯანის მთავრობასთან შეხვედრების დროსაც იმართება და პროცესი ჯერჯერობით დასრულებული არ არის.