ოპოზიციონერმა დეპუტატმა ჯონდი ბაღათურიამ იურიდიულ საკითხთა კომიტეტის თავმჯდომარე პავლე კუბლაშვილი კონსტიტუციის  მიმართ უპასუხისმგებლო დამოკიდებულებაში დაადანაშაულა.

იურიდიულ საკითხთა კომიტეტის სხდომაზე სადაც, კონსტიტუციაში ცვლილებების ბოლო ფორმულირება განიხილებოდა, ბაღათურიამ კუბლაშვილს შეკითხვა დაუსვა - არის თუ არა დანაშაული, როდესაც ერთი ადამიანის სასარგებლოდ ან საწინააღმდეგოდ კონსტიტუცია იცვლება.

,,ეს არის პარლამენტის და პარლამენტარიზმის ისტორიისთვის სამარცხვინო ფაქტი, როდესაც კონსტიტუციის მიმართ უპასუხისმგებლო დამოკიდებულება ხდება. ჩვენ არ უნდა დავუშვათ კონსტიტუციის დარღვევა“ - აღნიშნა ჯონდი ბაღათურიამ.

მისივე თქმით, საკონსტიტუციო ცვლილებების განხილვის ერთთვიანი პროცედურა დარღვეულია, რადგან, საყოველთაო სახალხო განხილვის კომისიამ სულ სხვა ცვლილებებზე იმსჯელა. ამჟამად კი, სხვა ვარიანტი განიხილება.

,,ეს არის კომიკური უკანონო ფორმულირება, რომელსაც ფრაქცია ,,ერთობა სამართლიანობისთვის“ მხარს არ დაუჭერს“ - განაცხადა ბაღათურიამ.

ბაღათურიას იურიდიულ საკითხთა კომიტეტის თავმჯდომარე პავლე კუბლაშვილმა ურჩია, რომ ნუ გამოიყენებს ისეთ სიტყვებს, როგორიც არის კომიკური და სასაცილო, რადგან, ეს მის განცხადებას მეტ დამაჯერებლობას მაინც არ სძენს.

კუბლაშვილის განმარტებით პოლიტიკური პროცესისთვის მნიშვნელოვანია, რომ არჩევნებს ჩრდილი არ მიადგეს. ამიტომაც, პარლამენტის კონსტიტუციაში ცვლილებებს მხარს დაუჭერს.

კუბლაშვილის თქმით, საკონსტიტუციო ცვლილებების განხილვის პროცედურა არ დარღვეულა.