საქართველოს პრეზიდენტი მიხეილ სააკაშვილი თავის ახლადარჩეულ ფრანგ კოლეგას ფრანსუა ოლანდს ტელეფონით ესაუბრა.
პრეზიდენტის ადმინისტრაციის ცნობით, სააკაშვილმა ოლანდს არჩევნებში გამარჯვება მიულოცა და საფრანგეთში ჩატარებულ არჩევნებს ისტორიული უწოდა.
მისი თქმით, საარჩევნო კამპანიამ ინეტერესი და იმედი საფრანგეთის საზღვრებს მიღმაც აღძრა.
ადმინისტრაციის ცნობით, სააკაშვილმა ხაზი იმ საერთო ღირებულებებს გაუსვა, რომელსაც ორი ერი იზიარებს. ასევე, აღნიშნა საფრანგეთის როლი ზოგადად ევროპისთვის და განსაკუთრებით საქართველოსთვის.
ადმინისტრაციის ინფორმაციით, ფრანსუა ოლანდმა მიხეილ სააკაშვილს გულითადი მადლობა გადაუხადა და საქართველოს ტერიტორიული მთლიანობისა და ქვეყნის დემოკრატიის მიმართ მხარდაჭერა გამოთქვა.
ოფიციალური ინფორმაციით, ორივე ლიდერმა განაცხადა, რომ ფრანგულ–ქართულ ორმხრივ ურთიერთობებს დიდ მნიშვნელობას ანიჭებენ. ასევე მათ დაასტურეს, რომ ამ ურთიერთობების პროგრესი სწრაფი ტემპით გაგრძელდება. ამასთან, პრეზიდენტებმა უახლოეს მომავალში შეხვედრის სურვილიც გამოთქვეს.
ფრანსუა ოლანდის ინაუგურაცია ხვალ დილითაა დაგეგმილი.