პოლიტიკური პარტია „განახლებული საქართველოსთვის“ სამი წევრის დაკავების ფაქტს დღეს სააპელაციო სასამართლოში გაასაჩივრებს. ამის შესახებ დღეს გამართულ პრესკონფერენციაზე პარტიის ახალგაზრდული ორგანიზაციის თავმჯდომარემ სოსო გიორგაძემ განაცხადა.

მისი თქმით, პარტიის წევრები 12 მაისს ხალხის აქტივობისა და სიმრავლის გამო დააკავეს.

„ეს მშვიდობიანი შერიგების დღე იყო, რომელიც აფხაზებს, ქართველებსა და ოსებს შორის ურთიერთობის აღდგენას ისახავდა მიზანდ. სწორედ ამიტომ იყო განსაკუთრებით აღმაშფოთებელი ხელისუფლების მხრიდან ამ ნაბიჯის გადადგმა. დაკავება აბსოლუტურად უსაფუძვლოდ მოხდა“- განაცხადა გიორგაძემ და აღნიშნა, რომ პროცესზე მოწმეებად ის პოლიციელები დაკითხეს, რომლებმაც ახალგაზრდები დააკავეს.

„დღესვე მერიაში საპროტესტო აქციებთან დაკავშირებით განცხადებას შევიტანთ და იმ შემთხვევაში თუ სააპელაციო სასამართლო ჩვენს მოთხოვნას არ დააკმაყოფილებს, ორშაბათიდან პარლამენტის წინ ყოველდღიურ რეჯიმში ახალგაზრდების საპროტესტო აქციები დაიწყება“- განმარტა გიორგაძემ.

„განახლებული საქართველოსთვის“ 6 წევრი 12 მაისს, პარლამენტის წინ დევნილთა შეკრების დროს დააკავეს. 3 მათგანი დაკავებიდან რამდენიმე წუთში გაათავისუფლეს, დევი ნანობაშვილს, ლაშა ჯავახიშვილსა და გოჩა მანჯავიძეს კი, 20 დღიანი პატიმრობა შეეფარდათ.