საკანონმდებლო ორგანო „შრომის კოდექსში“ ცვლილებებზე მსჯელობას იწყებს. დღეს პარლამენტის ჯანდაცვის კომიტეტის სხდომა გაიმართება, სადაც „შრომის კოდექსში“ ცვლილებები განიხილება.
მთავრობის საპარლამენტო მდივნის გია ხუროშვილის განცხადებით, ქართული მხარე შრომის საერთაშორისო ორგანიზაციასთან აქტიურად თანამშრომლობს, რომელსაც „შრომის კოდექსთან“ დაკავშირებით გარკვეული რეკომენდაციები აქვს.
მისივე თქმით, ამ ორგანიზაციასთან კონსულტაციების შემდეგ, ცვლილებების მომზადების გადაწყვეტილება იქნა მიღებული.
მთავრობის საპარლამენტო მდივანი განმარტავს, რომ ამჟამინდელი ლიმიტი, რომელიც შრომით ურთიერთობაში გაფიცვის ხანგძლივობის კუთხით არსებობდა და 90 დღეს არ უნდა აღემატებოდეს, უქმდება და ლიმიტი აღარ იარსებებს.
გია ხუროშვილის თქმით, კოდექსში ცვლილება პროფესიული შრომითი კავშირის დაფუძნების საკითხსაც შეეხება.
მოქმედი კანონმდებლობის თანახმად, პროფესიული კავშირის დასაფუძნებლად სულ მცირე 100 პირის ინიციტივა უნდა ყოფილიყო წარდგენილი, ცვლილებების მიღების შემდეგ კი, ეს ციფრი 50 პირამდე შემცირდება.
„შრომის კოდექსთან“ დაკავშირებით საკუთარი შენიშვნები აქვს საპარლამენტო ოპოზიციას, რომელსაც პარლამენტში განხილვისას წარადგენენ.