კოალიცია „ქართული ოცნების“ ლიდერი ბიძინა ივანიშვილი ჟურნალისტებს კორექტულობისკენ მოუწოდებს.
ივანიშვილმა ამის თაობაზე მაშინ ისაუბრა, როდესაც მას ჟურნალისტებმა ჰკითხეს - ფიქრობს თუ არა, რომ საქართველოს იმიჯს ზიანს აყენებს კოალიციის წევრების, თუნდაც დავით უსუფაშვილის განცხადებები, თითქოს საქართველო ნატო-ში გაწევრიანებისთვის ჯერ მზად არ არის.
იავნიშვილმა უსუფაშვილის თანდასწრებით ჟურნალისტებს განუცხადა, ეს თავად მისთვის ეკითხათ, რაზეც უსუფაშვილმა განმარტა, რომ ეს ტყუილია და მსგავსი განცხადებები არასოდეს გაუკეთებია. ამის შემდეგ ივანიშვილმა ჟურნალისტებს მიმართა.
„მე არ მინდა თქვენი მისამართით მუდამ მოწოდებები გავაკეთო, მაგრამ ვფიქრობ, ამის საჭიროება ჯერ კიდევ არსებობს. შეეცადეთ იყოთ კორექტულები. მე ვიცი, რომ თქვენ ხართ ტელევიზიაში, მათ თავიანთი მიმართულება აქვთ და თავიანთი მეპატრონეები ჰყავთ, მაგრამ თქვენ მაინც შეეცადეთ მაქსიმალურად კორექტულები იყოთ იმ დავალების შესრულებისას, რომელსაც იღებთ“ - განაცხადა მან.
ივანიშვილმა ასევე აღნიშნა, რომ ზუსტად არ იცის იმ თანხის ოდენობა, რომელსაც ის უცხოელ ლობისტებზე ხარჯავს. თუმცა. მისი განცხადებით, ეს თანხა გაცილებით ნაკლებია იმასთან შედარებით, რასაც პრეზიდენტი ხარჯავს ამ მიმართულებით.
„მე ჩემი შრომით მოპოვებულ ფულს ვხარჯავ, მაგრამ სააკაშვილი, რომელსაც მხარს უჭერთ და დაუჭირეთ - ეს თქვენი ნებაა, თქვენს ფულს, ჩვენი ხალხის ფულს ხარჯავს. მე ჩემი ფულის დახარჯვის უფლება მაქვს და თქვენ შეეკითხეთ მას, ვინც ასეთ შეკითხვებს გიკვეთავთ - რამდენს ხარჯავს. იქნებ ეს გაარკვიოთ“ - განაცხადა ივანიშვილმა.