საქართველოს პრეზიდენტი ყვარელში, ილია ჭავჭავაძის სახლ-მუზეუმში, „კომპიუტერული ცოდნის გამავრცელებელი საზოგადოების“ პრეზენტაციას დაესწრო.
მიხეილ სააკაშვილმა ღონისძიებაზე შეკრებილ საზოგადოებას სიტყვით მიმართა და მათ ამ ინიციატივის მნიშვნელობაზე ესაუბრა.
როგორც პრეზიდენტმა აღნიშნა, საქართველოს გადარჩენისა და სახელმწიფოებრიობის შენარჩუნების ერთ-ერთი ყველაზე მარტივი გზა განათლებაა.
მისი თქმით, ქვეყანამ სწორედ განათლების საშუალებით უნდა იპოვოს საკუთრი ნიშა და მსოფლიო ბაზრებზე არსებული ტენდენციები კომპიუტერის საშუალებით უნდა აკონტროლოს. საამისოდ კი, კომპიუტერისა და ინგლისური ენის ათვისება მას აუცილებლობად მიაჩნია.
ქვეყნის პირველმა პირმა ასევე განაცხადა, რომ აღნიშნული საზოგადოება მიზნად საქართველოს სოფლების კომპიუტერებითა და ინტერნეტით უზრუნველყოფას ისახავს.
მისი თქმით, სოფლების 80 პროცენტში ინტერნეტი ხელმისაწვდომი იქნება, ხოლო თბილისი სრულად დაიფარება WI-FI სისტემით. მან იმედი გამოთქვა, რომ 2015 წელს სკოლის მოსწავლეების 90 პროცენტს საკუთარი კომპიუტერი ექნება.
სიტყვით გამოსვლის შემდეგ პრეზიდენტმა „კომპიუტერის ცოდნის გამავრცელებელი საზოგადოების“ დაფუძნების ოფიციალური დოკუმენტი გააფორმა. მან დეკლარაციას ხელი საკუთარი ID ბარათის მეშვეობით, ელექტრონულად მოაწერა.
იუსტიციის სამინისტროს ინიციატივით, პირველ ეტაპზე საქართველოს 300-მდე სოფელშია კომპიუტერული ცენტრების შექმნა დაგეგმილი. ცენტრებში მოსახლეობა ინტერნეტით სარგებლობის სწავლას და საკუთარი პროდუქციის Online გაყიდვას შეძლებს.
კომპიუტერული მომსახურების ცენტრებში ადგილობრივი ინსტრუქტორები იმუშავებენ, რომლებიც ტრენინგსა და კონსულტაციას გაივლიან.