პრეზიდენტ მიხეილ სააკაშვილს რუსეთის პრეზიდენტის ვლადიმერ პუტინის განცხადება საქართველოს წარმატებად მიაჩნია.
როგორც სააკაშვილმა აღნიშნა, რუსეთის დუმაში დამტკიცებისას პრეზიდენტმა, რომელმაც საქართველოს ტერიტორიების ოკუპაციას მოაწერა ხელი, განაცხადა, რომ არ უყვარს სააკაშვილი, თუმცა, მზადაა საქართველოს რეფორმები გადაიღოს.
„არ ვიცი სხვა მაგალითი მსოფლიოს ისტორიაში, რომ ასჯერ დიდი ქვეყნის წარმომადგენელი, რომელიც პატარა ქვეყნის ოკუპაციას ახორციელებს, გამოთქვამდეს მზადყოფნას ამ ქვეყნისგან ისწავლოს საკუთარის მართვა“ - განაცხადა სააკაშვილმა.
მისივე თქმით, ეს პარადოქსული მაგალითი საქართველოს მიღწევებზე მეტყველებს.
„ეს ყველაფერი ჩვენი გახსნილობის შედეგია“-განაცხადა სააკაშვილმა და დასძინა, რომ საქართველოს მსოფლიოში დაჩაგრულის იმიჯი არ აქვს. პირიქით, პრეზიდენტი მიიჩნევს, რომ ქვეყანას განვითარების დიდი პერსპექტივა გააჩნია.