„ქრისტიან–დემოკრატებმა“ პარლამენეტში მიმდინარე პროცესებს აბსურდი უწოდეს. უმცირესობის ლიდერმა გიორგი თარგამაძემ დღეს პარლამენტის სხდომაზე განაცხადა, რომ ხელისუფლება პრობლემებს მოგვარების ნაცვლად, ართულებს.
„ამ აბსურდის მეორე ნაწილი ის არის, რაც ივანიშვილის მხარდამჭერი საზოგადოების მხრიდან ხდება. ისინი ისე აპროტესტებენ ამ შესაძლებლობას ლამის საქართველოს პარლამენტის დარბაზი პროტესტის ნიშნად დატოვონ. ასეთი ორმხრვივი აბსურდი გვაქვს“ _ აღნიშნა თარგამაძემ.
მისივე აზრით, „ქრისტიან–დემოკრატების“ მიზანია, რომ არჩევნები სამართლიანი და კონკურენტული იყოს.
„ეს უნდა იყოს განხილვის საგანი და არა ის, რომ ერთი ჯიუტად ვირზეა შემჯდარი, სიმბოლურად ვამბობ, პირდაპირ არ ვგულისხმობ, მაგრამ შეიძლება მალე ესეც ვნახოთ, რადგან ძალიან აქტიურია ჩვენი პრეზიდენტი. პირველი აქედან არ ჩამოდის და მეორე დაინტერესებულია რომ მათ ლიდერს მოქალაქეობა არ ჰქონდეს“ – განაცხადა თარგამაძემ.
იგი პარლამენტში საკონსტიტუციო ცვლილების მეორე მოსმენით განხილვისას ალტერნატიულ პროექტს წარმოადგენს, რომელიც ევროკავშირის წევრი ქვეყნის მოქალაქის საქართველოში ბოლო 3 წლის მანძილზე მუდმივად ცხოვრების უფლებას შეეხება.
პარლამენტმა საკონსტიტუციო ცვლილება პირველი მოსმენით დღეს მიიღო. კონსტიტუციაში ცვლილებებს 112 დეპუტატმა ერთხმად დაუჭირა მხარი.
კონსტიტუციის გარდამავალ დებულებებს ასეთი შინაარსის ახალი 104/4 მუხლი დაემატა - „2014 წლის 1 იანვრამდე საპარლამენტო და საპრეზიდენტო არჩევნებში მონაწილეობის და ხმის მიცემის უფლება საქართველოს მოქალაქეებთან ერთად შესაბამისი ასაკიდან ასევე აქვთ პირებს, რომლებიც დაბადებული არიან და ბოლო 10 წელი მუდმივად ცხოვრობენ საქართველოში და ევროკავშირის წევრი სახელმწიფოს მოქალაქეობა აქვთ“.
კენჭისყრამდე საპარლამენტო უმრავლესობამ და ოპოზიციამ ამ ფორმულირებაზე საკმაოდ ბევრი იდავა.