ამერიკელი მილიონერი ენდრიუ მურდზა და მისი პარტნიორი, ამერიკაში მყოფი ქართველი დავით კარტოზია ქალაქ ლაზიკას პროექტისთვის ბოლომდე იბრძოლებენ.  ამის შესახებ კარტოზიამ ამერიკიდან სოციალური ქსელის „სკაიპის“ მეშვეობით გამართულ პრესკონფერენციაზე ჟურნალისტებს განუცხადა.
მისი თქმით, ქალაქ ლაზიკას აშენების იდეა სწორედ მათ ეკუთვნოდათ და ის საქართველოს ხელისუფლებამ მიითვისა.
ბიზნესმენი იხსენებს, რომ იდეის ავტორებმა ლაზიკას პროექტი 2010 წლის დეკემბერში, აშშ-ში მაშინდელ საქართველოს ელჩს ბათუ ქუთელიას გააცნეს.
მისივე თქმით, პროექტის შესახებ მოლაპარაკებებში საქართველოს ხელისუფლების სხვა წარმომადგენლები, მათ შორის დავით ტყეშელაშვილი და თემურ იაკობაშვილიც იყვნენ ჩართული. კარტოზიას განმარტებით, არსებობდა შეთანხმება რომ მიმდინარე წლის თებერვალში აღნიშნულ საკითხთან დაკავშირებით ამერიკაში ქართული დელეგაცია უნდა ჩასულიყო, თუმცა, საქართველოს მთავრობისგან მას შემდეგ არანაირი პასუხი აღარ მიუღიათ.
„2012 წლის 14 თებერვალს ჩვენ 100%-ით დავრწმუნდით, რომ ლაზიკას პროექტი მოგვპარეს. საქართველოს საელჩოში განგვიცხადეს, რომ საქართველოდან დელეგაცია ჩამოსვლას არ აპირებდა და საერთოდ არ გვიცნობდნენ“ - განაცხადა მან.
კარტოზიას თქმით, საქართველოს მთავრობასთან მოლაპარაკებებში მსოფლიო ბანკის წარმომადგენელი მაიკლ ველკანდასიც მონაწილეობდა.
კარტოზიას შეფასებით, ლაზიკას პროექტს მსოფლიოში ანალოგი არ აქვს.
„ეს უნდა ყოფილიყო 21-ე საუკუნის ქალაქი. დაგეგმილი იყო ეკოლოგიურად სუფთა და მწვანე ქალაქის მშენებლობა. იქ 30-32 ათასი მოქალაქე იცხოვრებდა, რომლებიც ხამანწკების წარმოებით დაკავდებოდნენ“ - განაცხადა კარტოზიამ.
მისივე თქმით, ხამანწკა მსოფლიო ბაზარზე საკმაოდ ძვირადღირებული პროდუქტია - აშშ-ში თითო ხამანწკა 1-2 აშშ დოლარი ღირს.
ამერიკელი მილიონერი და მისი ქართველი პარტნიორი აცხადებენ, რომ პროექტის დასაცავად და დასაბრუნებლად ყველა გზას მიმართავენ.
„ჩვენ ყველაფერს გავაკეთებთ, რომ დღევანდელი მთავრობის აღვირახსნილობა მთელს მსოფლიოს ვაჩვენოთ“ - აღნიშნა მან.
კარტოზია სამოქმედო სტრატეგიის დაკონკრეტებას ამ ეტაპზე არ აპირებს, თუმცა, არ გამორიცხავს, რომ სასამართლოს მიმართოს.
ანაკლიასა და ყულევს შორის ახალი ქალაქის, ლაზიკას მშენებლობის შესახებ საქართველოს პრეზიდენტმა გასულ წელს განაცხადა. მისი თქმით, ქალაქი 10 წელიწადში აშენდება და ის თბილისის შემდეგ საქართველოში სიდიდით მეორე იქნება.