საპარლამენტო უმრავლესობის ერთ-ერთი ლიდერის შოთა მალაშხიას შეფასებით, „ქართული ოცნების“ წევრების აზრი საბჭოთა კავშირში დაბრუნება და ოკუპირებულ ტერიტორიებზე ეთნოწმენდის დაკანონებაა.

ამის თაობაზე განცხადება მალაშხიამ „თავისუფალი დემოკრატების“ წევრის გიორგი ცაგარეიშვილის საპასუხოდ გააკეთა. ცაგარეიშვილმა 2 მაისს, ქუთაისობას პრეზიდენტ სააკაშვილის მიერ გაკეთებული განცხადება აფხაზეთთან დაკავშირებით ცინიზმად შეაფასა.

„გასაკვირი არ არის, რომ რეფორმების მსხვერპლს, „გაიშნიკ“ ცაგარეიშვილს ახლანდელი პერიოდი უკვირს. მთლიანად „ქართული ოცნების“ წევრთა აზრიც უკან, საბჭოთა კავშირში დაბრუნებაა. მათ სურთ, რომ ოკუპირებული ტერიტორიების ეთნოწმენდა დაკანონდეს, იმიტომ რომ კრემლიდან სხვა დავალება არ მიუღიათ“ – განაცხადა მალაშხიამ.

მან „ქართულ ოცნებას“ სტრუქტურა უწოდა და პარტიის ლიდერის, ირაკლი ალასანიას მიერ გაკეთებული განცხადებებიც გააკრიტიკა.

„ეს სტრუქტურა ყოველდღიურად გვეუბნება, რომ ომი ჩვენ დავიწყეთ, ეთნოწმენდაში ჩვენ ვართ დამნაშავე. მისი ერთ-ერთი ლიდერი გამოდის და საუბრობს, რომ ოკუპირებული ტერიტორიების სიახლოვეს შეიარაღებულ ფორმირებებს ვქმნით. ერეკლეს დროსაც იყო ერთი „თავისუფალი დემოკრატი,“ რომელიც აღა–მაჰმად ხანთან მივიდა და უთხრა, ერეკლეს მეზარბაზნეები არ ჰყავსო“ – აღნიშნა მალაშხიამ.

დეპუტატის თქმით, საზოგადოება კარგად ხედავს, რომ ზოგიერთს საქართველოში საბჭოთა კავშირის ქურდულ–კრიმინალური მენტალიტეტის რესტავრაცია სურს. „მაგრამ, ეს მატარებელი უკვე წავიდა. ამის შანსი არავის არა აქვს, არც თქვენი „ოცნების“ ხელმძღვანელებს – პუტინსა და მედვედევს“ – მიმართა შოთა მალაშხიამ საპარლამენტო ოპოზიციის ნაწილს.