საგარეო საქმეთა მინისტრის მოადგილემ ნიკოლოზ ვაშაკიძემ რუსეთის პრეზიდენტ ვლადიმერ პუტინს ქართველი ხალხისთვის დღესასწაულის შეურაცხმყოფელი სახით მოლოცვისგან თავის შეკავება ურჩია.  
„არც საქართველო და არც მისი ხალხი ასეთ შეურაცხმყოფელ მილოცვებს არ იღებს. მათ შეუძლიათ ასეთი მილოცვებისგან ამიერიდან თავი შეიკავონ“ - აღნიშნა ვაშაკიძემ.
რუსეთის პრეზიდენტის პრესსამსახურმა დღეს, გავრცელებულ განცხადებაში ფაშიზმზე გამარჯვების დღე საქართველოს მოსახლეობას, ასევე ე.წ. აფხაზეთსა და სამხრეთ ოსეთს მიულოცა.
განცხადების თანახმად, საქართველო გამონაკლისია სადაც, რუსეთი ფაშიზმზე გამარჯვების დღეს საქართველოს ხალხს ულოცავს და არა მის ხელისუფლებას.
ვაშაკიძის განცხადებით, პუტინს შეუძლია მილოცვებით თავი არ შეიწუხოს.
მსოფლიო, 8-9 მაისს ფაშიზმზე გამარჯვების 67-ე წლისთავს აღნიშნავს. მსოფლიო მასშტაბით, ამ დღესთან დაკავშირებით, სხვადასხვა ღონისძიებები იმართება.