"ევროპელი დემოკრატები" მსოფლიო ბანკს უსამართლო გადასახადების მსოფლიო რეიტინგების გამოქვეყნებისკენ მოუწოდებენ.
 როგორც პარტიის ერთ-ერთმა ლიდერმა ლიკა ნაღებაშვილმა დღეს გამართულ ბრიფინგზე განაცხადა, საქართველომ საერთაშორისო რეიტინგში - "Paying Taxes 2012", გადასახდელების გადახდის სიმარტივის მიხედვით, გასულ წელთან შედარებით 22 საფეხურით წაიწია და 183 ქვეყანას შორის 39-ე ადგილი დაიკავა.
 მისივე თქმით, საინტერესოა, როგორ ხდება გადახდის სიმარტივე, როცა საქართველოს მოსახლეობის 2/3 უმუშევარია და მათთვის დენისა და დასუფთავების გადასახადების გადახდა რთულია. ნაღებაშვილის განცხადებით, მოსახლეობას უჭირს ასევე 112-ის საფასურის - 20 თეთრის გადახდა. "ნებისმიერი, თუნდაც უმნიშვნელო კანონის მიღების პრეცედენტი, ქვეყანაში უსამართლობასა და განუკითხაობის დაკანონების საფრთხეს ქმნის",-აღნიშნა მან.
"ევროპელმა დემოკრატებმა" ხელისუფლებას საკუთარი გადაწყვეტილებების კანონიერების გადახედვისკენ მოუწოდეს და მსოფლიო ბანკს მსგავსი ტიპის კვლევების ჩატარების დროს საქართველოში არსებული მდგომარეობის გათვალისწინება სთხოვეს.