„დემოკრატიული მოძრაობა-ერთიანი საქართველოს“ ლიდერი ნინო ბურჯანაძე მიიჩნევს, რომ მისი გამიჯვნა კოალიცია „ქართული ოცნებისგან“ ხელოვნურად ხდება.

როგორც მან დღეს განმარტა, „სახალხო კრებასა“ და „დემოკრატიულ მოძრაობას“ კოალიციაში გაწევრიანების სურვილი არასოდეს ჰქონია.

ბურჯანაძის განმარტებით, „სახალხო კრება“ მასშტაბური ორგანიზაციაა, რომელსაც უამრავი მხარდამჭერი ჰყავს და კოალიციაში გაწევრიანების მიზეზიც არ არსებობს.

„რატომ უნდა შევიდეთ კოალიციაში, მით უმეტეს, იქ არიან ადამიანები, რომელთაგან ზოგიერთმა უხარისხო ქართველები გვეძახა,ზოგმა ჩვენ დაგვაკისრა პასუხისმგებლობა გასული წლის 26 მაისის მოვლენებზე და, რომლებიც ბრძოლის გაუგებარ გზას გვთავაზობენ. ტყუილად ირჯებოდნენ ბატონები, რომლებიც ამბობდნენ, რომ ბურჯანაძეს კოალიციაში არ მივიღებთო “- აღნიშნა „დემოკრატიული მოძრაობის“ ლიდერმა.

მისივე თქმით, „სახალხო კრებისა“ და „დემოკრატიული მოძრობის“ კოალიციიდან გამიჯვნა ხელოვნურად ხდება და ყველა არგუმენტი, თუ რატომ არ თანამშრომლობდენ ბურჯანაძესთან, თითიდან გამოწოვილია.

„ცხადია, ეს იყო მოგონილი არგუმენტები, სინამდვილეში ამის უკან დგას სხვა რამ, რისი თქმაც კოალიციის წევრებს, მათ შორის კოალიციის ლიდერს ბიძინა ივანიშვილს არ უნდა“ - განაცხადა ბურჯანაძემ.

მისი განმარტებით, კოალიციიდან გამიჯვნის ერთ-ერთი მიზეზი ის იყო, რომ „დემოკრატიული მოძრაობა“ ქუჩის აქციების მომხრეა, თუმცა, კოლიციამ აქციები სტადიონზე ახლა თავად დაგეგმა.

ბურჯანაძე მეორე მიზეზად, ხელისუფლების მიერ „დემოკრატიული მოძრაობისადმი“ მიკრულ იარლიყს - პრორუსულობას ასახელებს.

„თუმცა მათ კოალიციაში მიიღეს „მრეწველები“, რომლებიც აცხადებენ, რომ საქართველოს ნატო-ში გაწევრიანება არის უბედურება. მაშ, რა არის ის არგუმენტი რასაც ვერ ამბობს ვერავინ „ქართული ოცნებიდან“ -აღნიშნა ბურჯანაძემ.

მისივე თქმით, საუკეთესო ვარიანტი მხოლოდ კონკურენციის შიში იქნებოდა და არა სხვა რაიმე უფრო ღრმა მიზეზი.