საქართველოს ახალგაზრდა იურისტთა ასოციაცია ევროკავშირის წევრი ქვეყნის მოქალაქეების მიერ არჩევნებში  მონაწილეობასთან დაკავშირებით საქართველოს საკონსტიტუციო ცვლილებებში საფრთხეებს ხედავს და საკუთარ დასკვნას აქვეყნებს.

დასკვნა საყოველთაო-სახალხო განხილვის საორგანიზაციო კომისიის სხდომაზე საია-ს წარმომადგენელმა თათული თოდუამ წარადგინა, რომლის თანახმადაც, მაღალ პოლიტიკურ თანამდებობაზე არჩევისას სხვა ქვეყნის შეიარაღებული ძალების ან უშიშროების თანამშრომელს შეხება ექნება ისეთ სახელმწიფო საიდუმლოებასთან, რომელთან წვდომა თვით საქართველოს მოქალაქესაც არ აქვს.

„ეს უკანასკნელი ქმნის იმ სახელმწიფოს მიერ საქართველოს საქმეებში ჩარევის საფრთხეს, რომლის მოქალაქესაც წარმოადგენს პოლიტიკური უფლებების მქონე უცხოელი. ეს საფრთხე არ არსებობს ორმაგი მოქალაქეობის შემთხვევაში, ვინაიდან პირი, რომელიც ჩადგება თავისი მეორე მოქალაქეობის სახელმწიფოს შეიარაღებული ძალების ან უშიშროების სამსახურში, კარგავს საქართველოს მოქალაქეობას და მასთან ერთად პოლიტიკური თანამდებობის დაკავების უფლებასაც“ – ნათქვამია დასკვნაში.

თათული თოდუას თქმით, აღნიშნული ცვლილება შეუსაბამოა იმ საკანონმდებლო პოლიტიკასთან, რასაც პარლამენტი ამ წლებში ატარებდა.

მან „მოქალაქეთა პოლიტიკური გაერთიანების შესახებ“ კანონიც გაიხსენა, რომლის თანახმადაც, უცხო ქვეყნის ფიზიკურ და იურიდიულ პირებს საქართველოში რეგისტრირებული პარტიის სასარგებლოდ ფინანსური ან მატერიალური შემოწირულობა ეკრძალებათ. 2011 წლის ბოლოს ამავე კანონში შესული ცვლილებით, პარტიების დაფინანსება იურიდიულ პირებსაც აეკრძალათ. აღნიშნული აკრძალვის მიზეზი ქართულ პოლიტიკაში სხვა ქვეყნის, მათ შორის ევროკავშირის წევრი ქვეყნის, მოქალაქეთა გავლენის თავიდან აცილება იყო.