საქართველოს პარლამენტის თავმჯდომარე დავით ბაქრაძე ოფიციალური ვიზიტით დღეს გერმანიის ფედერაციულ რესპუბლიკას ეწვევა.

პარლამენტის პრესსამსახურის ინფორმაციით, ბაქრაძე ვიზიტის ფარგლებში გერმანიის ბუნდესტაგის თავმჯდომარეს ნორბერტ ლამერსს შეხვდება. იგი ასევე, ბუნდესტაგში საგარეო საქმეთა კომიტეტის თავმჯდომარესთან რუპრეხტ პოლენცთან და კომიტეტის წევრებთან გეგმავს შეხვედრას.

პარლამენტის თამჯდომარე კონრად ადენაუერის ფონდში სიტყვით გამოვა და საქართველოს საელჩოში ვოლფგანგ ბიორნზენის წიგნის პრეზენტაციას დაესწრება.

საქართველოს საპარლამენტო დელეგაციას, რომელსაც დავით ბაქრაძე ხელმძღვანელობს, პარლამენტის თავმჯდომარის მოადგილე ლევან ვეფხვაძე, განათლების, მეცნიერების და კულტურის კომიტეტის თავმჯდომარე გიორგი გაბაშვილი და იურიდიულ საკითხთა კომიტეტის თავმჯდომარის პირველი მოადგილე ჩიორა თაქთაქიშვილი წარმოადგენენ.

დელეგაცია საქართველოში 10 მაისს დაბრუნდება.