„დემოკრატიული მოძრაობა-ერთიანი საქართველოს“ მთავრი საბჭოს წევრი შალვა ოგბაიძე რუსთავის ავტოდრომის რეკონსტრუქციით ავტომრბოლელ შოთა აფხაზავას დაინტერესებას საკუთარ დამსახურებად მიიჩნევს.
როგორც მან „ნიუსპრესს“ განუცხადა, აფხაზავა საქართველოში მან ჩამოიყვანა და ავტოდრომის რეკონსტრუქციის პროექტიც თავად წარუდგინა.
„ეს ავტოდრომი იმ პიროვნებამ ააშენა, რომელიც პირადად მე ჩამოვიყვანე, მე დავაინტერესე, რეკონსტრუქციის პროექტიც მე წარვუდგინე და მის სასახელოდ უნდა ითქვას, რომ საკამოდ სოლიდური თანხა ჩადო, ამ ავტოდრომის მოსაწყობად სერიოზული ინვესტიცია განახორციელა“- განაცხადა ოგბაიძემ.
მისი თქმით, იყო დიდი საშიშროება, რომ აღნიშნულ ადგილას ავტოდრომი აღარ ყოფილიყო და ის ფაქტი, რომ ამ ტერიტორიამ აფხაზავას წყალობით პროფილი არ შეიცვალა, დასაფასებელია.
როგორც ოგბაიძემ აღნიშნა, რუსთავის ავტოდრომი საავტომობილო ფედერაციას იმ პერიოდში გადაეცა, როდესაც მას თავად ხელმძღვანელობდა.
„ერთი შეკითხვა მაქვს - შოთა აფხაზავას „ლეიბორისტული პარტიის“ ოფისთან შემთხვევით ფეხი რომ წაუცდეს, მაგალითად, მანქანა ჩაუქრეს და იქ დაინახონ, აღმოჩნდება თუ არა აფხაზავას ფული რუსული ფული და აღმოჩნდება თუ არა აფხაზავა სამშობლოს მოღალატე?“- აღნიშნა ოგბაიძემ და დასძინა, რომ სასურველია, აფხაზავას მანქანა არც ერთი ოპოზიციური პარტიის ოფისთან არ გაუჩერდეს.
რუსთავის განახლებული ავტოდრომი პრეზიდენტმა მიხეილ სააკაშვილმა რამდენიმე დღის წინ გახსნა. მისი განცხადებით, ავტოდრომი ყველა სტანდარტს შეესაბამება და მის მშენებლობაში შოთა აფხაზავამ 20 მლნ აშშ დოლარის ინვესტიცია ჩადო.