რუსეთის მმართველი პარტია „ედინაია რასიას“ ხელმძღვანელმა დიმიტრი მედვედევმა ქვეყნის პრეზიდენტობაზე კასტინგი ვერ გაიარა და ახლა პრემიერ-მინისტრობის კასტინგის გავლა სურს.  ამის შესახებ დღეს საგარეო საქმეთა მინისტრმა გრიგოლ ვაშაძემ მედვედევის მიერ, რამდენიმ დღის წინ, საქართველოს პრეზიდენტის მიმართ გამოთქმული კრიტიკული შენიშვნების კომენტირებისას განაცხადა.
მინისტრის თქმით, მას ჰგონია, რომ ეს პროცესიც ისეთივე „წარმატებით“ დასრულდება, როგორც მისი მცდელობა ეთამაშა რუსეთის პრეზიდენტის როლი. მისივე თქმით, მედვედევის მიერ გატარებული ყველა რეფორმა წარუმატებელი აღმოჩნდა.
„მისი ე.წ. პრეზიდენტობის დროს რა სფეროსაც უნდა გადაავლოთ თვალი იქნება ეს ჯანდაცვის, არმიის, შინაგან საქმეთა სამინისტროს მიერ გატარებული რეფორმა - სრული კატასტროფაა“- განაცხადა ვაშაძემ.
რაც შეეხება ქართველი ხალხის მიმართ რუსეთის პრეზიდენტის სიყვარულს, მინისტრის განმარტებით, ეს რუსეთის ფედერაციის ხელისუფალთა მიერ საქართველოს წინააღმდეგ განხორციელებულ ქმედებებში გამოჩნდა.
„მათ საქართველოს ტერიტორიის 20% ოკუპირებული აქვთ. ნახევარ მილიონზე მეტი საქართველოს მოქალაქე საკუთარ ქვეყანაში დევნილად არის ქცეული. ამ ლტოლვილების ბოლო ტალღა კი, 2008 წლის აგვისტოში მივიღეთ, როდესაც მედვედევი რუსეთის ფედერაციას სათავეში ედგა“ -აღნიშნა ვაშაძემ.
მედვედევმა რამდენიმე დღის წინ ჟურნალისტებს განუცხადა, რომ საქართველოს ახალი ხელისუფალი ეყოლება და რუსეთი მასთან ითანამშრომლებს.
„დარწმუნებული ვარ მთელ ჩვენს ხალხს არანაირი ანტიპათია არ აქვს საქართველოს მიმართ. პირიქით, საქართველო ჩვენთვის ახლობელი ქვეყანაა, ქართველი ხალხი ახლობელი და ძვირფასი ხალხია ჩვენთვის. სხვათაშორის, საქართველოში ცალკეული პოლიტიკანების განცხადებების მიუხედავად, ჩვენ არაერთხელ გადაგვირჩენია ის. სააკაშვილი ცარიელი ადგილია, ნულია. ის ადრე თუ გვიან წავა საქართველოს პოლიტიკური ისტორიიდან“ - განაცხადა მედვედევმა და აღნიშნა, რომ რუსეთი მზადაა საქართველოში ნებისმიერ ახალ ლიდერთან თანამშრომლობისა და დიპლომატიური ურთიერთოებების აღდგენისთვის.