„ლიბერალური აკადემია-თბილისი“ საქართველოს ევროკავშირთან გასულ წელს გაფორმებული „ვიზის ფასილიტაციისა და რეადმისიის ხელშეკრულების“ ეფექტური იმპლიმენტაციის მიზნით, რეკომენდაციებს აძლევს.

ერთწლიანი კვლევის ანგარიში - “ვიზის ფასილიტაცია და რეადმისია: უზივო მიმოსვლის პერსპექტივები“ ორგანიზაციამ საზოგადოებას დღეს გააცნო.

როგორც „ლიბერალური აკადემია-თბილისის“ დირექტორმა ქეთევან ციხელშვილმა განაცხადა, კვლევის მიზანი იყო იმ პროგრესის, ასევე პრობლემების გამოკვეთა, რომელიც ხელშეკრულებების გაფორმების შემდეგ გამოიკვეთა.

მისივე თქმით, ვიზის ფასილიტაციის შეთანხმება რამდენიმე ძირითად ასპექტს ითვალისწინებს - ევროკავშირის ქვეყანაში გამგზავრების დამადასტრურებელი დოკუმენტების გამარტივება, სავიზო განაცხადის განხილვის ვადის შემცირება, სავიზო მოსაკრებლის შემცირება, გარკვეული კატეგორიებისთვის სავიზო რეჟიმის საერთოდ გაუქმება და სხვა.

მიუხედავად ამისა, როგორც ციხელაშვილმა აღნიშნა, გამოიკვეთა რამდენიმე პრობლემა, რომელიც ამ შეთანხმების იმპლიმენტაციას ართულებს.

„მართალია, გამგზავრებისთვის მხოლოდ ერთი დოკუმენტია საჭირო, მაგრამ დამატებითი დოკუმენტების ნუსხა არ არის ჰარმონიზებული. ყველა საკონსულოს თავისი ნუსხა აქვს, რომელიც საკმაოდ ფართოა. პრობლემას ქმნის ისიც, რომ ინფორმაცია ყოველთვის არ არის ხელმისაწვდომი. მოქალაქეებს პრობლემა ექმნებათ სატელეფონო საუბრის, ადგილზე მისვლის და ან ვებ-გვერდის ნახვისას “-აღნიშნა ციხელაშვილმა.

მისი თქმით, ამასთან, სავიზო განაცხადების ვადა შემცირდა, მაგრამ მოქალქეებს დიდხანს უწევთ ლოდინი აპლიკაციის შეტანამდე.

„გამოწვევად რჩება ისიც, რომ საელჩოებსა და საკონსულოებში მოქალაქეთა მოსაცდელები მოწესრუგებული უნდა იყოს. ამასთან, მომსახურების ენა უნდა იყოს ქართული, მათ შორის, დოკუმენტების შევსებისას. ჩვენთან ასე არ ხდება, რაც დამატებით ხარჯებთანაა დაკავშირებული“ - განამარტავს ციხელაშვილი.

„ლიბერალური აკადემია-საქართველოს“ დირექტორი მიიჩნევს, რომ ამ პრობლემებმა, შესაძლოა, საქართველო-ევროკავშირს შორის ვიზების ლიბერალიზაციის პროცესს ხელი შეუშალოს.