,,თავისუფალი დემოკრატების" წევრის, დეპუტატ გიორგი ცაგარეიშვილის მტკიცებით, ,,ქართული ოცნება" ნებისმიერ დროს ჩატარებული არჩევნების მოსაგებად მზად არის.
,,ქართული ოცნება" მზად იყო და არის არჩევნებისთვის, რადგან კარგად გააზრებული გეგმა გვაქვს და ყველაფერი ამ გეგმის მიხედვით წავა. ჩვენი გამარჯვება გარდაუვალია. რაც უფრო მალე ჩატარდება არჩევნები, მით უფრო მალე მოხდება ამ ხელისუფლების გასტუმრება პოლიტიკურ მოუსავლეთში", – განაცხადა ცაგარეიშვილმა.
ჟურნალისტებთან საუბრისას მან ,,ახალი თაობა – ახალი ინიციატივის" იდეა შეაფასა და აღნიშნა, რომ ეს არასამთავრობო ორგანიზაცია პროსახელისუფლებოა და შესაბამისად, არჩევნების მაისში ჩატარების მოთხოვნაც ხელისუფლების დაკვეთით მოდის.
,,ჩვენს ხელისუფლებას ჰყავს საკუთარი საპარლამენტო უმცირესობა, საკუთარი მედიასაშუალებები, საკუთარი ზონდერები, ახლა, როგორც ჩანს, საქმეში ჩართეს საკუთარი არასამთავრობოები. არჩევნების მაისში გადმოტანის მცდელობა ხელისუფლების შიშებთან არის დაკავშირებული. ნათლად ჩანს, რომ მათი საქმე სულ უკან მიდის და ამიტომ ჩქარობენ", – განაცხადა ცაგარეიშვილმა.
"ახალი თაობა - ახალი ინიციატივა" საკონსტიტუციო სარჩელს ამზადებს და უახლოეს დღეებში სასამართლოს მიმართავს. ორგანიზაცია საპარლამენტო არჩევნების 2012 წლის მაისში ჩატარებას ითხოვს.