საქართველოს სამი ახალი ელჩი ჰყავს. დავით მუმლაძის, შალვა ცისკარაშვილისა და მამუკა ციხელაშვილის კანდიდატურებს პარლამენტმა დღეს უყარა კენჭი.

ყაზახეთის რესპუბლიკაში საქართველოს საგანგებო და სრულუფლებიანი ელჩი დავით მუმლაძე, ჟენევაში გაერო-ს განყოფილებებსა და სხვა საერთაშორისო ორგანიზაციებში საქართველოს მუდმივი წარმომადგენელი შალვა ცისკარაშვილი, ხოლო ნორვეგიის სამეფოში საქართველოს საგანგებო და სრულუფლებიანი ელჩი მამუკა ციხელაშვილი გახდა.

დავით მუმლაძე სხვადასხვა დროს პარლამენტის აპარატის იურიდიული დეპარტამენტის უფროსი, იუსტიციის საბჭოს მდივანი, პარლამენტის მაჟორიტარი დეპუტატი, პრეზიდენტის რწმუნებული და შს მინისტრის მოადგილე იყო.

რაც შეეხება ნორვეგიში საქართველოს სრულუფლებიან ელჩს მამუკა ციხელაშვილს, ახალ დანიშვნამდე მუშაობდა სომხეთის რესპუბლიკაში საქართველოს საელჩოს კონსულად, საგარეოს საქმეთა სამინისტროს საერთაშორისო ეკონომიკურ, კულტურულ და ჰუმანიტარული ურთიერთობის დეპარტამენტის დირექტორის მოადგილედ. 2009 წელს მიენიჭა საგანგებო და სრულუფლებიანი დესპანის რანგი.

ჟენევაში გაერო-ს განყოფილებებსა და სხვა საერთაშორისო ორგანიზაციებში საქართველოს მუდმივი წარმომადგენელი შალვა ცისკარაშვილი 2009 წლიდან დღემდე გაეროში მუდმივი წარმომადგენლის მოადგილედ მუშაობდა. ის, ასევე იყო საქართველოს საგარეო საქმეთა სამინისტროს საერთაშორისო ორგანიზაციების დეპარტამენტის დირექტორის მოადგილე.