კამპანიის "ეს შენ გეხება" ფარგლებში შემუშავებულ პეტიციას არაერთი ცნობილი ჟურნალისტი, ექსპერტი და სამოქალაქო საზოგადოების წარმომადგენელი შეუერთდა.
ჟურანლისტ ია ანთაძის განცხადებით, ამგვარ სამოქალაქო აქტივობას შედეგი აუცილებლად მოჰყვება. "კანონმდებლობა არის შესაცვლელი და კარგია, რომ ამდენი ხალხი მოვიდა. ასეთი აქტიურობა შედეგამდე მიგვიყვანს".
ჟურნალისტი თამარ ჩიქოვანი მიიჩნევს, რომ კამპანია დასავლეთისთვის არის გამიზნული. "იყო რამდენიმე შემთხვევა, როცა ხელისუფლებამ მედიისა და არასამთავრობოების მოთხოვნა გაითვალისწინა. მთლიანობაში ამ კამპანიას უფრო დიდი მნიშვნელობა აქვს დასავლეთისთვის, რომ დაინახონ, საქართველოში არსებობენ მოქალაქეები, რომლებიც რაღაცას აპროტესტებენ".
ჟურნალ "ლიბერალის" რედაქტორის, შორენა შავერდაშვილის აზრით კი, მნიშვნელოვანია აღნიშნულ კამპანიას მხოლოდ კანონმდებლობის შეცვლაზე მომუშავე პირები არ შეუერთდნენ, არამედ თითოეული მოქალაქე ჩაერთოს. "პეტიციის მიზანი, კონკრეტული საკანონმდებლო ცვლილებების მიღებაა, რომელიც საარჩევნო გარემოს უკავშირდება. არსებული კანონმდებლობა თითოეულ მოქალაქეზე აისახება, რადგან შეიძლება შეიცვალოს გამოხატვის თავისუფლება და პოლიტიკური ნება. ძალიან მნიშვნელოვანია თითოეული მოქალაქის ჩართვა. ეს არ უნდა იყოს მხოლოდ პროფესიული წრეების ბრძოლის საგანი",-განაცხადა შავერდაშვილმა.
არჩევნების თემაზე მომუშავე არასამთავრობო და მედიაორგანიზაციებმა წამოიწყეს კამპანია "ეს შენ გეხება", რომლის ფარგლებშიც ისინი მოქმედი საარჩევნო კანონმდებლობის შეცვლას ითხოვენ.