პარტია „თავისუფალი საქართველოს“ თავმჯდომარის მოადგილეს მიმი გაბრიჩიძეს შინაგან საქმეთა სამინისტროს თანამშრომლები ემუქრებიან. ამის შესახებ მან დღეს გამართულ პრესკონფერენციაზე განაცხდა.
მიმი გაბრიჩიძის განცხადებით, მის მიმართ მუქარა და დაშინება ხორციელდება.
მისივე თქმით, შსს-ს თანამშრომლები გაბრიჩიძისგან პოლიტიკური საქმიანობის შეწყვეტას მოითხოვენ, წინააღმდეგ შემთხვევაში, მისი და ოჯახის წევრების მიმართ ანგარიშსწორებით ემუქრებიან.
პარტია „თავისუფალი საქართველო“ მიმი გაბრიჩიძეზე ზეწოლაზე პასუხისმგებლობას შსს-ს აკისრებს.
პარტიის წარმომადგენელთა ინფორმაციით, მიმი გაბრიჩიძემ ერთ-ერთ პრესკონფერენციაზე, პრეზიდენტისთვის ნარკოლოგიური შემოწმების ჩატარება მოითხოვა და შსს-ს თანამშრომლები მისგან სწორედ ამ წინადადების უარყოფას მოითხოვენ.
„პრეზიდენტის ნარკო-დამოკიდებულებაზე ეჭვები ივერიის ღვთისმშობლის სახელობის ტაძრის საფუძვლის ჩაყრისას გაჩნდა, სადაც მიხეილ სააკაშვილი არაადეკვატურად იქცეოდა და საუბრობდა. ამგვარი რეზონანსი, კიდევ უფრო აძლიერებს ეჭვს მიხეილ სააკაშვილის ნარკო-დამოკიდებულებაზე“-განაცხდა გაბრიჩიძემ.
პარტიაში აცხადებენ, რომ მიუხედავად ზეწოლისა, „თავისუფალი საქართველო“ არჩეულ კურსს არ შეიცვლის.