საქართველომ და გაიანის რესპუბლიკამ დიპლომატიური და საკონსულო ურთიერთობების დამყარების შესახებ ერთობლივ კომუნიკეს ხელი მოაწერეს.
ხელმოწერილი დოკუმენტის თანახმად, სახელმწიფოები ერთმანეთთან ურთიერთობებში თანასწორობის, ეროვნული სუვერენიტეტის, ტერიტორიული მთლიანობის პატივისცემისა და ერთმანეთის შიდა საქმეებში ჩაურევლობის პრინციპებით იხელმძღვანელებენ.
საგარეო საქმეთა სამინისტროს ინფორმაციით, გაიანის მხრიდან ერთობლივ კომუნიკეს ხელი მოაწერა სახელმწიფოს მუდმივმა წარმომადგენელმა გაეროში, საგანგებო და სრულუფლებიანმა ელჩმა ჯორჯ უილფრედ ტელბოტმა, საქართველოს მხრიდან კი, საქართველოს მუდმივმა წარმომადგენელმა გაეროში, საგანგებო და სრულუფლებიანმა ელჩმა ალექსანდრე ლომაიამ.
ხელმოწერის ცერემონია ნიუ-იორკში, გაეროსთან საქართველოს მუდმივ წარმომადგენლობაში გაიმართა.
დამკვიდრებული პრაქტიკის შესაბამისად, დიპლომატიური ურთიერთობების დამყარების შესახებ მხარეებმა ერთობლივი წერილით აცნობეს გაეროს გენერალურ მდივანს ბან კი მუნს.
საქართველოს დიპლომატიური ურთიერთობები 167 სახელმწიფოსთან აქვს.