"დემოკრატიული მოძრაობა - ერთიანი საქართველოს" გენერალური მდივანი ვახტანგ ყოლბაია ალტერნატიული "კარდაკარის" დაწყების შესახებ "ამომრჩეველთა ლიგის"  ინიციატივას მხარს უჭერს.
როგორც ყოლბაიამ "ნიუსპრესთან" საუბრისას განაცხადა, "დემოკრატიულმა მოძრაობამ" მამუკა კაციტაძის ამომრჩეეველთა სიების დაზუსტების უზრუნველყოფის კომისიის შექმნის შემდეგ განცხადება გაავრცელა, სადაც ისინი ოპოზიციურ პარტიებს ალტერნატიული კომისიის შექმნისკენ მოუწოდებდნენ.
მისი თქმით, საარჩევნო სიების დაზუსტების მიზნით შექმნილი სპეციალური კომისია ხელისუფლების პოლიტიკური ნებიდან გამომდინარე, რეალურად თავისუფალი და დემოკრატიული არჩევნების გარემოს შექმნაზე ორიენტირებული ვერ იქნებოდა.
"ვეჭვობდით, რომ ეს პროექტიც ძველებურად ხელისუფლების მიერ ამომრჩეველთა მოსატყუებლად, დროის გასაჭიანურებლად, ბიუჯეტიდან გამოყოფილი ფულის ათვისებისთვის იყო გამიზნული. 2010 წლის არჩევნებისთვის, სიების დასაზუსტებლად 1,2 მლნ ლარი იყო გამოყოფილი, თუმცა, ამ მხრივ პრაქტიკულად არაფერი გაკეთებულა"- განაცხადა ყოლბაიამ.
"დემოკრატიული მოძრაობის" გენერალური მდივნის განმარტებით, კაციტაძის კომისიის შექმნიდან რამდენიმე დღეში არასამთავრობო ორგანიზაციების უმრავლესობამ და ზოგიერთმა პოლიტიკურმა პარტიამ მათ უნდობლობა გამოუცხადა.
ყოლბაია ამომრჩეველთა სიების გადასამოწმებლად არასამთავრობო ორგანიზაციებს და "ამომრჩეველთა ლიგას" ერთიანი ძალისხმევის გაერთიანებისკენ მოუწოდებს.
"ჩვენ მზადა ვართ ერთიანი ფრონტის შექმნისთვის. იმედია, ეს ორგანიზაცია დამოუკიდებელი იქნება და ბოლომდე მიიყვანს თავის დანაპირებს. საჭიროა, რეალური ნაბიჯების გადადგმა, მაგრამ სამწუხაროდ პოლიტიკური ნების გამო, საქმეს ისეთი პირი არ უჩანს, რომ რეალურად განხორციელდეს" - აღნიშნა ვახტანგ ყოლბაიამ.
"ამომრჩეველთა ლიგა" საარჩევნო სიების დაზუსტების უზრუნველყოფის კომისიას უნდობლობას უცხადებს და საარჩევნო სიების გადასამოწმებლად, ალტერნატიული "კარდაკარის" აქციის დაწყებას გეგმავს.
სამოქმედო გეგმა "ამომრჩეველთა ლიგის" თავმჯდომარემ კოკა გუნცაძემ ჟურნალისტებს 20 აპრილს გამართულ ბრიფინგზე წარუდგინა.
სიების დაზუსტების უზრუნველყოფის კომისია "კარდაკარს" 24 აპრილიდან იწყებს.