მიმდინარე წლის მაისიდან პარტია "ქართული ოცნება - დემოკრატიული საქართველო" ყველა ოჯახში "კარდაკარის" პრინციპით მივა. ამის შესახებ პარტია "ქართული ოცნება - დემოკრატიული  საქართველოს" საინიციატივო ჯგუფის წევრმა ელისო ჩაფიძემ დღეს გამართულ პრესკონფერენციაზე განაცხადა.

მისი თქმით, 2 თვეა პარტიული სტრუქტურების მშენებლობა დაწყებულია, მაისიდან კი, აქტიური მუშაობა რეგიონებში დაიწყება.

მისი განმარტებით, ეს თითოეულ ამომრჩევლამდე მისვლას და "კარდაკარის" პრინციპით სიების გადამოწმებას გულისხმობს.

"მიუხედავად დიდი პატივისცემისა, სამთავრობო კომისიების მიერ გადამოწმებულ სიებს ვერ ვენდობით და გვინდა ჩვენი მონაცემებიც ხელში გვქონდეს"- განაცხადა ჩაფიძემ.

მისივე განცხადებით, სხვადასხვა მიმართულებით, სერიოზული მუშაობა მიმდინარეობს.

"შეიძლება ითქვას, რომ პირველი გამარჯვება საერთაშორისო დამკვირვებლების მოწვევაა, ასევე ჩვენი მოთხოვნაა საერთაშორისო ორგანიზაციებიდან გვყავდეს გრძელვადიანი მედიამონიტორები"- აღნიშნა ჩაფიძემ.

მისი თქმით, სატელევიზიო სიუჟეტებით ერთი მხრივ, ხელისუფლების პიარი და მეორე მხრივ, ბიძინა ივანიშვილის და მისი გუნდის ანტიპიარი მიმდინარეობს. ჩაფიძე მიიჩნევს, რომ ამ საკითხს შეფასება უნდა მიეცეს.

მისივე განცახდებით, ნორმალური საარჩევნო გარემოს შექმნისთვის თანაბარი უფლებები უნდა გააჩნდეს ყველა პოლიტიკურ ძალას.

"ხელისუფლებას სურს, რომ მონიტორინგი განახორციელოს კომუნიკაციების მარგეულირებელმა ეროვნულმა კომისიამ. ჩვენ განსხვავებულ მოდელს ვთავაზობთ. ვფიქრობთ, რომ ეს ქართული და საერთაშორისო ექსპერტებისგან შემდგარმა ჯგუფმა უნდა გააკეთოს"- განაცხადა ჩაფიძემ.