სასაზღვრო პოლიციის ეგიდით დღეს "ნარკოტიკულ ნივთიერებათა კონტრაბანდის წინააღმდეგ ბრძოლის საკითხებში სასაზღვრო და სხვა შესაბამისი უწყებების თანამშრომლობის მუშა ჯგუფის" მორიგი შეხვედრა გაიმართება.
სხდომას შინაგან საქმეთა მინისტრი ვანო მერაბიშვილი და სასაზღვრო პოლიციის უფროსი, გენერალ-მაიორი ზაზა გოგავა გახსნის.
შეხვედრაში მონაწილეობას 18 ქვეყნის სასაზღვრო და სხვა უწყების წარმომადგენელი მიიღებს, მათ შორის არიან მსოფლიო სასაზღვრო ორგანიზაციის ევროკავშირის წარმომადგენლები, ევროკომისიისა და გაეროს განვითარების პროგრამის წარმომადგენლები და სხვა ოფიციალური პირები.
სასაზღვრო პოლიციაში აცხდებენ, რომ შეხვედრის მიზანს წარმოადგენს საქართველოს სახელმწიფო საზღვარზე ნარკოტიკული ნივთიერებების კონტრაბანდის წინააღმდეგ ბრძოლის სფეროში არსებული საფრთხეების შეფასება და გამოცდილების გაზიარება. შეხვედრაზე ასევე, საქართველოს შინაგან საქმეთა სამინისტროს შესაბამისი სტრუქტურული დანაყოფებისა და სახელმწიფო საზღვრის დაცვის სუბიექტების ნარკოტიკული ნივთიერებების კონტრაბანდის წინააღმდეგ ბრძოლის სფეროში კოორდინაცია განიხილება.
მუშა ჯგუფი ნარკოტიკული ნივთიერებების კონტრაბანდის წინააღმდეგ ბრძოლის სფეროში მონაწილე ქვეყნების წინაშე მდგომ საფრთხეებს შეაფასებს.