საპარლამენტო უმრავლესობის ერთ-ერთი ლიდერის, ნუგზარ წიკლაურის შეფასებით, ტაძრების აღდგენის დაბლოკვა იგივეა, რაც ადამიანმა ოშკსა და ხანძთას ულტიმატუმი წაუყენოს.  ეს განცხადება წიკლაურმა პარლამენტის დღევანდელ პლენარულ სხდომაზე გამართული დებატებისას გააკეთა.
მისი თქმით, 800 წელია ქართველ კაცს არ ჰქონდა შესაძლებლობა, რომ თურქეთში ტაძრებისთვის მიეხედა. წიკლაურის განცხადებით, ჯერ კიდევ 30-40 წლის წინ, ამ ქვეყანაში იყო წარწერები "მოქალაქე, ილაპარაკე სახელმწიფო ენაზე", რაც იმას ნიშნავდა, რომ ეროვნული უმცირესობებისთვის მშობლიურ ენაზე საუბარი აკრძალული იყო.
დეპუტატის ინფორმაციით, საქართველომ ქართული ტაძრების აღსადგენად თურქეთთან მოლაპარაკებები 2006 წლიდან დაიწყო. წიკლაურის მტკიცებით, საპატრიარქო ამ მოლაპარაკებების მიმდინარეობისას, ისევე, როგორც საზოგადოება, ინფორმირებული იყო.
"იმის გამო, რომ მუდმივად ხდებოდა ამ პროცესის ბლოკირება, დღეს ხანძთის გუმბათის კოლაფსია. რომელი თქვენგანი აგებს პასუხს, რომ ხვალ იგივე ბედი გაიზიაროს სხვა ქართულმა ძეგლებმა: იშხანმა, ოთხთა ეკლესიამ? ნუთუ იმდენად მნიშვნელოვანია თქვენთვის პოლიტიკური ქულები, რომ ეს ძეგლები გაიმეტოთ?" – განაცხადა წიკლაურმა. მანვე მხარდაჭერა გამოუცხადა ყველა იმ უწყებას, რომელიც თურქეთთან ხელშეკრულების დადებაში და ეკლესიების აღდგენაშია ჩართული.