"დევნილთა სამოქალაქო მოძრაობის" წევრებმა დღეს აქციაზე, მიმდინარე წლის 9 აპრილს მემორიალთან მათზე თავდასხმის ფაქტები გააპროტესტეს.
"დევნილთა სამოქალაქო მოძრაობის" თავმჯდომარის მანუჩარ სიგუას განცხადებით, ადამიანები, რომლებიც მემორიალთან სანთლების დასანთებად და ეროვნული გმირებისთვის პატივის მისაგებად მივიდნენ, ხელისუფების წარმომადგენლებმა ფიზიკური ძალის გამოყენებით ტერიტორიიდან გაიყვანეს.
მისივე თქმით, დევნილთა სამოქალაქო მოძრაობის წევრს გენადი კეკელიას სხეულზე დაზიანებები ახლაც აღენიშნება.
"9 აპირლის მემორიალთან მისვლა მთელ ერს თავისუფლად უნდა შეეძლოს. გენადი კეკელია ფიზიკური ზეწოლის შემდეგ სამოქალაქო ფორმაში ჩაცმულმა პირებმა სხვა მიმართულებით გადაიყვანეს, რაც ასევე უკანონობაა. იგი სამედიცინო ექსპერტიზას გაივლის და ამის შემდეგ შესაბამის ორგანოებს მიმართავს"- განუცხადა "ნიუსპრესს" სიგუამ.
აქციის მონაწილეების განცხადებით, ხელისუფლების ქმედებები იმას მოწმობს, რომ ხალხს მემორიალთან მისვლა ეკრძალება.
აფხაზეთიდან დევნილი მანანა გაბელიას თქმით, იგი 9 აპრილს მემორილთან საავადმყოფოდან მივიდა და საღამომდე დარჩენას აპირებდა, მაგრამ ამის საშუალება არ მისცეს.
"ნაოპერაციევი ხელის კვრით გამიყვანეს. ვინც კი გადამეფარა, ყველა სცემეს. აი, სწორედ ასეთია ეს ე.წ. ხელისუფლება და ამიტომ ვებრძვით მას"- განაცხადა გაბელიამ.