"თავისუფალი საქართველო" და "ქართველ ხალხთა მსოფლიო კონგრესი" საპარლამენტო არჩევნებში საზღვარგარეთ მცხოვრები ქართული დიასპორის წარმომადგენლების მონაწილეობას ერთობლივად გაუწევენ ორგანიზებას.  ამის შესახებ პარტია "თავისუფალი საქართველოს" ლიდერმა კახა კუკავამ დღეს პრესკონფერენციაზე განაცხადა.
კუკავას ინფორმაციით, საქართველოდან დაახლოებით 800 000-მდე მოქალაქეა გასული, თუმცა, საარჩევნო სიებში ოფიციალურად 400 000 რეგისტრირებული.
"ჩვენი მთავარი პრიორიტეტი ამ მოქალაქეების აღრიცხვა და არჩევნების პროცესში ჩართვაა, რათა ხელისუფლებამ მათი ხმები თავის სასარგებლოდ არ გამოიყენოს"- განაცხადა კუკავამ.
მისი თქმით, ასევე, "თავისუფალი საქართველოს" და კონგრესის პრიორიტეტია საზღვარგარეთ ქართული ლობის ქვეყნის ინტერესების სასარგებლოდ ამოქმედება.
როგორც კუკავამ აღნიშნა, მათ უკვე აქვთ ლობისტური ცენტრი სტრასბურგში. მათი გახსნა ევროპის სხვა ქალაქებშიც იგეგმება.
"თავისუფალი საქართველოს" ლიდერი უცხოეთში მცხოვრებ ქართველებს დიასპორებში გაწევრიანებისკენ მოუწოდებს, რათა ერთად შეძლონ მუშაობა საქართველოს პრობლემების გადასაჭრელად.
კახა კუკავამ და ქართველ ხალხთა მსოფლიო კონგრესის პრეზიდენტმა ალექსანდრე ებრალიძემ თანამშრომლობის შესახებ ოფიციალურად დღეს განაცხადეს.