კოალიცია „ქართული ოცნების“ ლიდერი ბიძინა ივანიშვილი ინტელიგენციას სულისკვეთების შენარჩუნებისკენ მოუწოდებს. ამის შესახებ მან ვაკეში „ქართული ოცნების“ ოფისის გახსნის შემდეგ განაცხადა.
„მოხარული ვარ, რომ ვაკეში გავხსენით ოფისი. ეს ძალიან მნიშვნელოვანია, რადგან ასეთი სულისკვეთებით სავსე ხალხი, რომელიც აქ ოფისის გახსნას ესწრებოდა, ჯერ არსად მინახავს“ - განაცხდა ივანიშვილმა.
კოალიციის ლიდერმა ოფისის გახსნის ცერემონიაზე ინტელიგენციას და კულტურის სფეროში დასაქმებულებს მოქმედებისკენ მოუწოდა.
აქვე, მან მაგალითად ერთ-ერთი ტელეკომპანიიდან გასართობი გადაცემების მსახიობების წასვლა მოიყვანა.
„გუშინ „რუსთავის 2“-დან 4 ახალგაზრდა წამოვიდა და თავისუფლებისკენ გადადგა ნაბიჯი. მათი გაბედულება გმირობის ტოლფასია, მათ შესანიშნავი მაგალითი მოგვცეს. მოვუწოდებ ინტელიგენციას - აღვიდგინოთ შელახული ღირსება“ - განაცხადა ივანიშვილმა.
ამ პროცესის დაწყებისკენ მან მთლიან საზოგადოებას მოუწოდა.