"ამომრჩეველთა ლიგის" წევრი კახა მიქაია აცხადებს, რომ სამეგრელოში ბანდფორმირებები სამხედრო რეზერვის საფარქვეშ არსებობენ.
"საქმე ეხება ირაკლი ალასანიას მიერ ნახსენებ შეიარაღებულ ფორმირებებს. ისინი ხელისუფლებას რეზერვის საფარქვეშ ჰყავს ამოფარებული" - განაცხადა მიქაიამ.
პარტია "თავისუფალი დემოკრატების" წარმომადგენლების ინფორმაციით, ირაკლი ალასანიამ ბოლო თვეების განმავლობაში სამეგრელოს რეგიონიდან მიწოდებული შეტყობინებების საფუძველზე, ეროვნული უშიშროების საბჭოს რეაგირებისთვის ზუგდიდში არაფორმალური შეიარაღებული ჯგუფების შესახებ ინფორმაცია გადასცა. ინფორმაციაში დასახელებული იყო მსგავსი დაჯგუფებების დისლოკაციის ადგილი და მათი წევრების ჩამონათვალი.
"ამომრჩეველთა ლიგის" წევრების განცხადებით, კახა მიქაია ერთ-ერთი პირველთაგანი იყო, ვინც ხელისუფლება უკანონო შეიარაღებული ფორმირებების შექმნის მცდელობაში ამხილა.
საზოგადოებრივი მოძრაობა მის დაპატიმრებას სწორედ აღნიშნულ ფაქტს უკავშირებდა.
ზუგდიდის სასამართლოს ეზოში 27 მარტს მიქაია "თავისუფალი დემოკრატების" წევრის სერგო ჩაჩიბაიას დაპატიმრების ფაქტს აპროტესტებდა, როდესაც ყოველგვარი ახსნა განმარტების გარეშე დააკავეს. კახა მიქაიას პატიმრობის ათდღიანი ვადა 6 აპრილს ამოიწურა.