ფონდი "ღია საზოგადოება - საქართველო" დღეს ახალი კვლევის "ელექტორატის პროფილი" პრეზენტაციას გამართავს. საზოგადოებრივი პოლიტიკის ინსტიტუტის მიერ ჩატარებული კვლევა არჩევნების წინ საარჩევნო სუბიექტების მხარდამჭერთა დემოგრაფიული პროფილის დადგენას ეხება.
კერძოდ, კვლევის ავტორებს მიაჩნიათ, რომ არჩევნების წინ საარჩევნო სუბიექტებისთვის განსაკუთრებით მნიშვნელოვანია არა მარტო ელექტორატის პოლიტიკური სიმპათიების გაგება, არამედ იმის დადგენაც, თუ როგორია მათი მხარდამჭერების ღირებულებები, მრწამსი და შეფასებები.
ამომრჩეველთა პოლიტიკური სიმპათიების დასადგენად კითხვარში შესაბამისი შეკითხვა დაამატეს, რომლის პასუხები საზოგადოებრივი პოლიტიკის ინსტიტუტმა გააანალიზა და შედეგებს დღევანდელ პრეზენტაციაზე წარმოადგენს.
კვლევის ავტორების აზრით, ამომრჩევლების პროფილის ცოდნა პოლიტიკურ სუბიექტებს კამპანიების უფრო მარტივად და ეფექტურად დაგეგმვაში დაეხმარება.
კვლევა ფონდ "ღია საზოგადოება - საქართველოს" მხარდაჭერით ჩატარდა.