უმრავლესობის ერთ-ერთი ლიდერის კობა ხაბაზის შეფასებით, დავით უსუფაშვილსა და ბიძინა ივანიშვილს 9 აპრილთან დაკავშირებით არც ერთი განცხადება არ გაუკეთებიათ.

„9 აპრილის მეორე დღეს ადამიანი კომპარტიის რიგებში შედის და ახლა კი, პარლამენტის წინ მოდის და ნიანგის ცრემლებს ღვრის, თითქოს ძალიან აწუხებს 9 აპრილი. დიახ, უსუფაშვილზე მოგახსენებთ, რომელიც 10 აპრილს, კომუნისტური პარტიის რიგებში გაწევრიანდა“ – განაცხადა პარლამენტის სხდომაზე გამოსვლისას კობა ხაბაზმა.
მისივე თქმით, ბიძინა ივანიშვილს 9 აპრილი ერთხელაც არ გასხენებია, უფრო მეტიც, „პირსისხლიან ჯალათს“ ლებედს აფინანსებდა.
„დიახ, ივანიშვილზე მოგახსენებთ, რომელსაც ერთხელაც არ გახსენებია 9 აპრილი. რა შეფასება უნდა მიეცეს ამას? ე.წ. „ქართულ ოცნებას“, რომელსაც მე რუსულ ოცნებას ვეძახი, არ გამიკვირდებოდა როდიონოვი და ლებედი რომ მოეყვანათ, დაეყენებინათ და ნიანგის ცრემლებით აეტირებინათ. ვერასდროს შევეგუები იმას, რომ 9 აპრილი გახდეს სიყალბე და გაპოლიტიკოსების მსურველთათვის ფარისევლობის და სიყალბის არენა“ – განაცხადა ხაბაზმა.
უმრავლესობის წევრი მიიჩნევს, რომ 9 აპრილი ცივილიზებული სამყაროსთვის ერთ–ერთი უმნიშვნელოვანესი დღე იყო, რადგან ამ დღეს შეუქცევადი გახდა რუსეთის ბოროტების იმპერიის ნგრევა.
„9 პარილი დარჩება როგორც კეთილის ბოროტზე გამარჯვების, თავისუფლებისთვის ბრძოლის, დაუმონებელი ქართული სულის დღე“, – აღნიშნა კობა ხაბაზმა.