"დევნილთა სამოქალაქო მოძრაობის" წარმომადგენელი გენადი კეკელია, რომელსაც დაცვის თანამშრომლებმა დღეს 9 აპრილის მემორიალი დაატოვებინეს,  სასამართლოში ჩივილს აპირებს. ამის შესახებ მან "ნიუსპრესს" განუცხადა.
მისივე თქმით, იგი პოლიციის თანამშრომლებს 2 საათის განმავლობაში ჰყავდათ დაკავებული.
"იმ ადამიანებს, რომლებიც მემორიალთან ხმამაღლა გამოვხატავდით პროტესტს მოგვვარდნენ ხელკეტებით, გვაიძულეს ტერიტორია დაგვეტოვებინა. ამის მერე რომ ვერაფერი გააკეთეს მანქანებში ჩაგვსვეს და წაგვიყვანეს კოლმეურნეობის მოედნის მიმდებარე ტერიტორიაზე. ჩაიწერეს ჩვენი მონაცემები და გვითხრეს, რომ ასე იყო საჭირო" - განაცხადა გენადი კეკელიამ.
იგი აღნიშნავს, რომ მან ამ დრომდე არ იცის თუ სად იმყოფებიან მასთან ერთად დაკავებული პირები. მათ შორის უცნობია მოძრაობის წევრის მანანა გაბელიას მდგომარეობაც.
კეკელიამ ასევე, აღნიშნა, რომ მათი პოლიციის მანქანაში ჩასმა ფიზიკური და სიტყვიერი შეურაცხყოფის ფონზე მოხდა.
გენადი კეკელიას თქმით, ის იურისტებთან ერთად იმსჯელებს თუ რა ფორმითაა შესაძლებელი აღნიშნულ ფაქტზე ჩივილი.