საქართველოს პრეზიდენტი მიხეილ სააკაშვილი ამ წუთებში პარლამენტის შენობაში სიტყვით გამოდის, სადაც იგი სხვადასხვა დამსახურებისთვის სამხედრო მოსამსახურეებს დააჯილდოებს.
მისი თქმით, არსებობენ ერები რომლებსაც ურჩევნიათ, სხვა ერების მორჩილებაში იმყოფებოდნენ, თუმცა, საქართველო ასეთი ერი არ არის.
"არსებობენ ერები, რომლებიც თავის თავს ხედავენ მხოლოდ მორჩილებაში, წარმატებას ხედავენ მხოლოდ დამხვდური ჩექმების ლოკვაში, ფულის კეთებასა და საკუთარი ოჯახის კეთილდღეობის გარანტიაში. მათ სჯერათ ჩვენი ქვეყნის მორჩილების იდეის და ფუნდამენტურად არ სჯერათ ჩვენი თავისუფლების იდეის"- განაცხადა სააკაშვილმა.
მისივე თქმით, მთელი საქართველოს ისტორია ჭიდილია თავისუფლებისა და მორჩილების იდეებს შორის.
"ყოველთვის არსებობენ ქართველები, რომლებიც ცდილობენ თავს მოგვახვიონ მორჩილების იდეა და არსებობენ ქართველები, რომლებიც იბრძვიან თავისუფლების იდეისთვის. მორჩილების და თავისუფლების იდეებს შორის საქართველოში ყოველთვის თავისუფლების იდეა იმარჯვებს"- განაცხადა პრეზიდენტმა.