დე ფაქტო სამხრეთ ოსეთში ჩატარებულ საპრეზიდენტო არჩევნებზე საქართველოს რეაქცია მკაცრი იქნება. ამის შესახებ დღეს ტრადიციულ  ბრიფინგზე საგარეო საქმეთა მინისტრის მოადგილემ ნინო კალანდაძემ განაცხადა.
"ჩვენს რეაქციას ექნება საერთაშორისო თანამეგობრობისადმი მიმართვის ფორმა, საიდანაც როგორც სხვა დროს, წარმატებულ ნაბიჯებს ველით" - განაცხადა ნინო კალანდაძემ.
მისივე თქმით, აღნიშნული ე.წ არჩევნებისადმი საქართველოს პოზიცია უცვლელი რჩება.
"ოკუპირებული ცხინვალი რჩება საქართველოს ოკუპირებულ ტერიტორიად და ერთადერთი სამართლებრივი სტატუსი, რითიც შეიძლება ამ ტერიტორიებზე მიმდინარე პროცესები განისაზღვროს არის ტერმინი - ოკუპაცია" - განაცხადა კალანდაძემ.
მისივე თქმით, არ შეიძლება ოკუპირებულ ტერიტორიებზე ჩატარებულ არჩევნებს ლეგიტიმური ეწოდოს, სანამ ეთნიკური წმენდის შედეგად ამ ტერიტორიებიდან განდევნილ მოსახლეობას სახლებში დაბრუნების და საკუთარი არჩევანის გაკეთების უფლება არ მიეცემათ.
სამხრეთ ოსეთის ე.წ. ცენტრალური საარჩევნო კომისიის თავმჯდომარის ბელა პლიევას განცხადებით, ე.წ. საპრეზიდენტო არჩევნების მეორე ტურში 54,12%-ით დე-ფაქტო უშიშროების კომიტეტის ყოფილმა თავმჯდომარემ ლეონით თიბილოვმა გაიმარჯვა. უფლებადამცველმა კანდიდატმა დავით სანაკოევმა კი, ხმათა 42,98% მიიღო.