"მოქალაქეთა პოლიტიკური გაერთიანებების შესახებ" კანონში განხორციელებული ბოლო დროინდელი ცვლილებები პოლიტიკური მოვლენების გაკონტროლებისკენ არის მიმართული ,- განაცხადა  საქართველოს საკითხებზე მომუშავე გაეროს სპეციალურმა მომხსენებელმა, მაინა კიაიმ დღეს გამართულ პრესკონფერენციაზე.
საქართველოს შესახებ მომზადებულ მაინა კიაის ანგარიშში ნათქვამია, რომ "მოქალაქეთა პოლიტიკური გაერთიანებების შესახებ" კანონის შეცვლის შედეგად, ქვეყანის მოქალაქეებს, ვისაც საქმიანი ურთიერთობა აკავშირებს პოლიტიკურ პარტიებთან, შეზღუდვები დაუწესდებათ.
"არასამთავრობო ორგანიზაციებს და ნებისმიერ იურიდიულ პირს უნდა ჰქონდეს უფლება, ნებისმიერ პოლიტიკურ კანდიდატს, ან პოლიტიკურ შეხედულაბას მხარი დაუჭიროს", - ნათქვამია გაეროს მომხსენებლის წინასწარ დასკვნაში.
მაინა კიაიმ ასევე აღნიშნა, რომ ამ საკითხზე ხელისუფლების მოსაზრებებსაც გაეცნო. იგი მიიჩნევს, რომ კანონი კონტროლის პალატას უფლებას აძლევს თავისი აზრის შესაბამისად მიიღოს გადაწყვეტილება.
გაეროს სპეციალური მომხსენებელი, მაინა კიაი საქართველოში მშვიდობიანი შეკრებისა და გაერთიანების თავისუფლების საკითხების შესასწავლად დაახლოებით ერთი კვირის წინ ჩამოვიდა. ქვეყანაში არსებული ვითარების შეახებ დასკვნა გაეროს მაისში წარედგინება.