ვიდრე გაეროს სპეციალური მომხსენებლის სრული ანგარიში მზად იქნება, იმედი მაქვს ხელისუფლება გაითვალისწინებს წინასწარ შეფასებებს,-  განაცხადა სახალხო დამცველმა გიორგი ტუღუშმა გაეროს სპეციალური მომხსენებლის საქართველოში ვიზიტის წინასწარი შედეგების გაცნობის შემდეგ.
სახალხო დამცველის, გიორგი ტუღუშის თქმით, გაეროს მომხსენებლის, მაინა კიაის წინასწარი შეფასებები საქართველოში არსებულ გარკვეულ პრობლემებსა და ნაკლოვანებებზე, საკმაოდ კრიტიკული იყო. მან, იმედი გამოთქვა, რომ მანამდე, ვიდრე სრული ანგარიში მზად იქნება, ხელისუფლება გაითვალისწინებს წინასწარ შეფასებებს. "გაეროს სპეციალური მომხსენებლის ანგარიში, როგორც წესი დიდ გავლენას ახდენს პროცესებზე, არა მხოლოდ საქართველოში. ამიტომ ძალიან საყურადღებოა თითოეული დასკვნა, რომელსაც ეს პიროვნება წარმოადგენს" , - განაცხადა სახალხო დამცველმა.
თავად გაეროს სპეციალურმა მომხსენებელმა, მაინა კიაიმ საქართველოში არსებული სამოქალაქო საზოგადოების აქტივობა დადებითად შეაფასა. მან განსაკუთრებით აღნიშნა, რომ უფლებების დაცვის სფეროში სახალხო დამცველის დაუღალავმა მუშაობამ მასზე განსაკუთრებული შთაბეჭდილება მოახდინა.
გაეროს სპეციალური მომხსენებელი, მაინა კიაი საქართველოში მშვიდობიანი შეკრებისა და გაერთიანების თავისუფლების საკითხების შესასწავლად რამდენიმე დღის წინ ჩამოვიდა. აქ არსებულ მდგომარეობაზე მისი საბოლოო დასკვნა გაეროს მაისში წარედგინება.