იუსტიციის სამინისტროს გადაწყვეტილებას სამართალთან საერთო არაფერი აქვს. ეს განცხადება კოალიცია „ქართული ოცნების“ წევრმა,  კონსტიტუციონალისტმა ვახტანგ ხმალაძემ ბიძინა ივანიშვილის მოქალაქეობასთან დაკავშირებით იუსტიციის სამინისტროს მიერ გამოქვეყნებული დასკვნის კომენტირებისას გააკეთა.

„ეს არის წმინდა წყლის პოლიტიკური გადაწყვეტილება და მას სამართლებრივი საფუძვლები არ გააჩნია“ - განაცხადა ხმალაძემ.

როგორც ხმალაძემ „ნიუსპრესთან“ საუბარში აღნიშნა, ბიძინა ივანიშვილი ამჟამად საფრანგეთის მოქალაქეა და მან იმ განცხადებასთან ერთად, რომელიც ხელისუფლებას ნატურალიზაციის წესით მოქალაქეობის მიღების მოთხოვნით წარუდგინა, საფრანგეთსაც მიმართა - საფრანგეთის მოქალაქეობიდან გასვლის თაობაზე.

ხმალაძის ინფორმაციით, ივანიშვილმა საფრანგეთისგან მიიღო საერთაშორისო კონვენციით გამყარებული პასუხი. მისივე ინფორმაციით, ამ კონვენციას საქართველოც უერთდება და ასეთივე ნორმას საქართველოს კანონიც ითვალისწინებს.

„საფრანგეთის ხელისუფლებამ ივანიშვილს უპასუხა, რომ ის დააკმაყოფილებს ივანიშვილის თხოვნას მოქალაქეობიდან გასვლის შესახებ, მას შემდეგ, რაც საქართველო მიიღებს გადაწყვეტილებას მოქალაქედ მისი მიღების თაობაზე ან განაცხადებს თანხმობას მისთვის მოქალაქეობის მინიჭებაზე იმ შემთხვევაში თუ მას შეუწყდება საფრანგეთის მოქალაქეობა“- აღნიშნა ხმალაძემ.

მისი თქმით, ასეთივე ჩანაწერია საქართველოს კანონშიც.

„მე რომ მომინდეს მოქალაქეობიდან გასვლა და სახელმწიფოს მივმართო თხოვნით, ის მომთხოვს გარანტიას, რომ რომელიმე სხვა სახელმწიფო აუცილებლად მიმიღებს მოქალაქედ. ეს იმას ნიშნავს, რომ სახელმწიფო არ უწყვეტს მოქალაქეობას პირს გარანტიის გარეშე, რათა ადამიანი მოქალაქეობის არქონის პირის მდგომარეობაში არ აღმოჩნდეს“- განმარტა ხმალაძემ.

კონსტიტუციონალისტის შეფასებით, ხელისუფლებამ ივანიშვილი გამოუვალ მდგომარეობაში ჩააყენა და ჯადოსნურ წრეში მოაქცია.

ხმალაძის თქმით, იუსტიციის სამინისტროს განცხადება, რომ ივანიშვილს ორმაგი მოქალაქერობის თხოვნით პრეზიდენტისთვის უნდა მიემართა, პოლიტიკური ეშმაკობაა, რადგან ორმაგი მოქალაქეობის მიღების მოთხოვნის შემთხვევაში, პრეზიდენტს უფლება აქვს მიანიჭოს ან არ მიანიჭოს პირს მოქალაქეობა და არანაირი მიზეზის მითითება, თუ რატომ არ ანიჭებს მოქალაქეობას, სავალდებულო არ არის.

„ცხადია, რომ მაშინ, როდესაც ივანიშვილის მოქალაქეობა სრულიად არაკონსტიტუციურად შეუწყვიტეს, ასეთი მიმართვის შემთხვევაში პრეზიდენტის გადაწყვეტილება უარი იქნება“ - განაცხადა ხმალაძემ.

სამოქალაქო რეესტრის სააგენტომ ბიძინა ივანიშვილის მიერ საქართველოს მოქალაქეობის მიღების საკითხთან დაკავშირებით დასკვნა გამოსცა.
სააგენტოში აცხადებენ, რომ ბიძინა ივანიშვილს, როგორც სხვა ქვეყნის მოქალაქეს, საქართველოს მოქალაქეობის მიღების მიზნით უნდა მიემართა ორმაგი მოქალაქეობის მინიჭების მოთხოვნით. მსგავსი თხოვნით კი - ივანიშვილს შესაბამისი ორგანოებისთვის დღემდე არ მიუმართავს.