წვრთნა „კავკასია 2012“ საქართველოსთვის, რომ საფრთხეს წარმოადგენს ცხადია.  ამის შესახებ უშიშროების საბჭოს მდივნის მოადგილემ ბათუ ქუთელიამ „ნიუსპრესსთან“ განუცხადა.
მისი განცხადებით, ამ საფრთხეზე როგორც რუსეთის მიერ დეკლარირებული, ისე განხორციელებული გეგმები მეტყველებენ. ქუთელიამ განხორციელებულ გეგმებში ომი, კიბერშეტევა და ოკუპირებულ ტერიტორიებთან განხორციელებული ტერაქტები იგულისხმა.
„დეკლარირებულში კი სწორედ ისეთ სცენარს ვგულისხმობ, როგორიცაა „კავკასია 2012“. ასევე, საქართველოს და მისი დედაქალაქის რუსეთის მიერ სამიზნედ არჩევა. როგორც მოგეხსენებათ, ასეთი კადრები გავიდა ტელევიზიით“ - განმარტა ბათუ ქუთელიამ.
უშიშროების საჭოს მდივნის მოადგილის განცხადებით, ბუნებრივია ხელისუფლება მშვიდად ვერ იქნება, რადგან რუსეთის დეკლარირებულ გეგმებში საქართველოსა და მთლიანად რეგიონში სიტუაციის დესტაბილიზაცია შედის. „ჩვენი ამოცანაა მზად ვიყოთ იმ გამოწვევებისთვის რასაც რუსეთი საქართველოს უგზავნის“ - განაცხადა ქუთელიამ.
რუსეთი სწავლება "კავკასია 2012-ის" ჩატარებას სექტემბერში გეგმავს. რუსეთის თავდაცვის სამინიტროს ინფორმაციით, სწავლებას სამხედრო სფეროში რეფორმის გატარების მხრივ განსაკუთრებით დიდი მნიშვნელობა ექნება და მასში ჩაერთვება ყველა სახის ელექტრო და კოსმოსური დაზვერვისა და კავშირის საშუალებები, უპილოტო აპარატურა და შეიარაღება.