საქართველოს საპარლამენტო უმრავლესობაში მიიჩნევენ, რომ რუსეთის მხრიდან ომის საფრთხე ძალიან მაღალია.
ჟურნალისტებთან საუბარში უმრავლესობის ერთ-ერთმა ლიდერმა ნუგზარ წიკლაურმა განაცხადა, რომ სექტემბრისთვის ოკუპირებულ ტერიტორიებზე დაგეგმილი ფართომასშტაბიანი წვრთნები დამშვიდების საშუალებას არ იძლევა.
,,რუსეთი ოკუპირებულ ტერიტორიებზე სამხედრო ბაზებს ავითარებს, მიმდინარეობს გამალებული შეიარაღება, მილიტარიზაციაა. ასეთ დროს ,,ქართული ოცნების" წევრთა განცხადებები აფხაზეთის ადმინისტრაციულ საზღვართან ბანდ-ფორმირებების გადაადგილების შესახებ, რუსებისთვის დამატებითი კოზირია პროვოკაციული ქმედებისთვის" - განაცხადა წიკლაურმა.
კითხვაზე თუ რა ზომებს მიმართავს საქართველო ამ საფრთხეების წინააღმდეგ, დეპუტატმა აღნიშნა, რომ ქვეყანა თავის შიარაღებულ ძალებს და სარეზერვო სისტემას წვრთნის, ასევე, მუდმივად ინფორმირებული ჰყავს მეგობარი ქვეყნები.
როგორც ცნობილია, საქართველოს ეროვნული უშიშროების საბჭოს მდივანმა გიგა ბოკერიამ რუსეთთან ახალი ომის შესაძლებლობა არ გამორიცხა. ამ თემაზე მან რადიოსადგურ "ეხო მასკვისთვის" მიცემულ ინტერვიუში ისაუბრა.
რუსეთი მასშტაბური სამხედრო წვრთნა "კავაკასია 2012-ის" ჩატარებას სექტემბერში გეგმავს. რუსეთის თავდაცვის სამინიტროს ინფორმაციით, სწავლებაში ჩაერთვება ყველა სახის ელექტრო და კოსმოსური დაზვერვისა და კავშირის საშუალებები, უპილოტო აპარატურა და შეიარაღება.