"ბიძინა ივანიშვილს ახლა ძალიან სჭირდება ჩემნაირი ადამიანების მხარდაჭერა" - ეს განცხადება "ნიუსპრესთან" საუბარში რეჟისორმა ქეთი დოლიძემ გააკეთა, რომელიც კოალიცია "ქართულ ოცნებას" უერთდება.
რეჟისორის თქმით, ივანიშვილის გუნდში გაერთიანება მას ქვეყანაში არსებულმა ვითრებამ გადააწყვეტინა.
"საზოგადოება იმდენად არის დეგრადირებული შიშისგან, რომ არ მინდა ასეთ ქვეყანაში ცხოვრება, ამიტომ მინდა რაღაც შეიცვალოს. მე მჯერა ბიძინა ივანიშვილის, მას ჩვენგან არაფერი სჭირდება" - განუცხადა "ნიუსპრესს" დოლიძემ და აღნიშნა, რომ ივანიშვილის პარტიაში საზოგადოებრივი, კულტურისა და უფლებების დაცვის კუთხით იმუშავებს.
დოლიძის განმარტებით, კანონმდებლობასა და იურიდიულ საქმეებში ჩარევას არ აპირებს, გარდა იმისა, რაც კულტურის სფეროს შეეხება.
"მინდა ჩემი კოლეგები, რომლებიც ძალიან მიყვარს თავისუფლები იყვნენ და რაღაცეებზე უარს იმიტომ არ ამბობდნენ, რომ სამსახურიდან არ მოხსნან ან მათი ოჯახის წევრებზე ზეწოლა არ განხორციელდეს"- აღნიშნა რეჟისორმა.
მისივე განცხადებით, ოპოზიციის ის ნაწილი, რომელიც ივანიშვილს გასულ წლებში ხელისუფლების დაფინანსებაში ადანაშაულებს, თავად საეჭვო ფულით ფინანსდება.
"ოპოზიცია თავის დროზე სად იყო? ერთად არ იყვნენ? ექვსეულები, რვიანები, ხუთიანები, ათიანები. მე მაინტერესებს ახლა ვინ აფინანსებს ამ ოპოზიციურ პარტიებს, საიდან იღებენ ფულს, როგორ დადიან რეგიონებში... ვინ აძლევს ამ ფულს? ხელისუფლება?" - დასძინა დოლიძემ.