პოლიტიკური მოძრაობა "თეთრები" ზუგდიდში "თავისუფალი დემოკრატების" ერთ-ერთი წევრის სერგო ჩაჩიბაიას დაკავების ფაქტს აპროტესტებენ.

როგორც "თეთრების" მიერ გავრცელებულ განცხადებაშია აღნიშნული, ეს მოვლენა მჭიდრო კავშირშია წინასაარჩევნოდ ხელისუფლების მიერ შემუშავებულ ტაქტიკასთან, ხელი შეუშალოს საარჩევნო სუბიექტების ნორმალურ ფუნქციონირებას.

"ამის ნათელი მაგალითია "ქართულ ოცნების " სუბიექტებზე ბოლო ხანს განხორციელებული ძალადობის ფაქტები და დაკავებები, რაც უკვე მასიურ სახეს იღებს. "სახალხო კრებაში" შემავალმა პარტიებმა და პოლიტიკურმა ორგანიზაციებმა საკუთარ თავზე გამოვცადეთ ხელისუფლების სადამსჯელო ოპერაციებისა და პოლიტიკური დევნის მთელი სიმძიმე, მარტო სახალხო კრებიდან 40-მდე პოლიტიკური ნიშნით დაპატიმრებული იხდის დღეისთვის სასჯელს. ამდენად ჩვენთვის განსაკუთრებულად მტკივნეული და მიუღებელია ხელისუფლების მიერ პოლიტიკური მოწინააღმდეგეებისა და სხვაგვარად მოაზროვნეთა დევნა-შევიწროვება" - აღნიშნულია განცხადებაში.

"თეთრები" პოლიტიკურ ძალებს გაერთიანებისკენ მოუწოდებენ.

"ქართული ოცნების" წარმომადგენლების განცხადებით, სერგო ჩაჩიბაია "თავისუფალი დემოკრატების" ლიდერის ირაკლი ალასანიასთვის, სამეგრელოში შეიარაღებული ფორმირებების შექმნასთან დაკავშირებით ინფორმაციის მიწოდების გამო დააკავეს.