ფრაქცია "ქრისტიან-დემოკრატებიდან" ფრაქცია "ძლიერ საქართველოში" "ქრისტიან-დემოკრატი" რატი მაისურაძე გადავიდა.   ეს გადაწყვეტილება გიორგი თარგამაძემ უკვე მიიღო.
როგორც "ნიუსპრესთან" საუბარში ლევან ვეფხვაძემ განაცხადა, რატი მაისურაძე "ქრისტიან-დემოკრატების" წევრად რჩება, თუმცა, ის ფრაქცია "ძლიერ საქართველოში" გადავიდა.
"ჩვენი ეს გადაწყვეტილება იმ მიზანმა განაპირობა, რომ საპარლამენტო უმცირესობამ გამოიყენოს ყველა ის ბერკეტი, რაც უმცირესობას გააჩნია, მათ შორის პარლამენტში პრეზიდენტის მოსვლის დროს", - აღნიშნა ლევან ვეფხვაძემ.
რატი მაისურაძე პარლამენტში "ქრისტიან-დემოკრატების" საარჩევნო სიით შევიდა. ამდენად, ორივე ფრაქციაში, როგორც "ქრისტიან-დემოკრატებში", ასევე, "ძლიერ საქართველოში" ექვს-ექვსი დეპუტატია. ორივე ფრაქცია კი უმცირესობას შეადგენს.
გია თორთლაძის ფრაქციის დაშლის საფრთხე მას შემდეგ შეიქმნა, რაც ყაზბეგის მაჟორიტარმა დეპუტატმა რომან მარსაგიშვილმა საპარლამენტო ფრაქცია "ძლიერი საქართველო" დატოვა და მეორე ოპოზიციურ ფრაქციაში, "ერთობა სამართლიანობისთვის" წევრობა გადაწყვიტა. "ძლიერ საქართველოში" რომან მარსაგიშვილის ჩათვლით 6 დეპუტატი იყო გაერთიანებული. პარლამენტის რეგლამენტის თანახმად, თუ ფრაქციაში შემავალი დეპუტატების რაოდენობა 6-ზე ნაკლები დარჩება, მაშინ ფრაქცია გაუქმებულად ითვლება.