საქართველოს პრეზიდენტი მიხეილ სააკაშვილი სეულში ვიზიტის ფარგლებში, სამხრეთ კორეის პრეზიდენტს პირისპირ შეხვდება. ამის შესახებ ინფორმაცია სოციალურ ქსელ "ფეისბუქზე"
პრეზიდენტის გვერდზე გამოქვეყნდა.
მიხეილ სააკაშვილის ვიზიტი სამხრეთ კორეაში უკვე დაწყებულია, სადაც იგი "ბირთვული უსაფრთხოების სამიტის" მუშობაში მიიღებს მონაწილეობას.
სამიტზე ბირთვული იარაღის ტერორისტული ჯგუფებისგან დაცვის მხრივ საერთაშორისო თანამშრომლობის საკითხებს განიხილავენ. მონაწილეები ასევე სხვადასხვა თემებზე იმსჯელებენ - თანამშრომლობა ბირთვული ტერორიზმის წინააღმდეგ მიმართულ ღონისძიებებში, ბირთვული იარაღის დაცვა და ბირთვული მასალებით უკანონოდ ვაჭრობის აღკვეთა.
სეულის ბირთვული უსაფრთხოების სამიტი ყველაზე ფართომასშტაბიანია მსოფლიოში. სამხრეთ კორეის დედაქალაქში 54 ქვეყნის ლიდერი, მაღალი დონის დელეგაციები და საერთაშორისო ორგანიზაციების წარმომადგენლები იმყოფებიან.

















