"თავისუფალი დემოკრატები" ირაკლი ალასანიას მიმართვაზე უშიშროების საბჭოს განცხადებას ეხმაურებიან.

როგორც პარტიის მიერ გავრცელებულ განცხადებაშია ნათქვამი, გასული წლების გამოცდილებამ, კერძოდ, მოსახლეობის დარბევისა და დაშინებისთვის არაფორმალური ე.წ. ზონდერ ჯგუფების გამოყენებამ ხელისუფლების რეალური სახე წარმოაჩინა.

"არაერთი კადრი გავრცელდა იმისა, თუ როგორ უსწორდებიან სამოქალაქო ტანსაცმელში ჩაცმული შეიარაღებული პირები ოპოზიციურად განწყობილ ჩვენს თანამოქალაქეებს. მსგავსი ტიპის შეიარაღებული დაჯგუფებების აქტიურობა ფიქსირდებოდა მას შემდეგ ჩატარებულ ყველა არჩევნებზე" - აღნიშნულია განცხადებაში.

"თავისუფალი დემოკრატების" წარმომადგენლების ინფორმაციით,
ირაკლი ალასანიამ, უკანასკნელი თვეების განმავლობაში სამეგრელოს რეგიონიდან მიწოდებული შეტყობინებების საფუძველზე, ეროვნული უშიშროების საბჭოს რეაგირებისთვის ზუგდიდში არაფორმალური შეიარაღებული ჯგუფების ფორმირებების შესახებ ინფორმაცია გადასცა.

ინფორმაციაში დასახელებული იყო ასეთი დაჯგუფებების დისლოკაციის ადგილი და მათი წევრების ჩამონათვალი.

"ჩვენი მხარდაჭერა პატიოსანი და პატრიოტი სამხედროების და პოლიციელების მიმართ ურყევია და გიგა ბოკერიას მცდელობა, დააპირისპიროს ისინი საზოგადოებასთან, განწირულია წარუმატებლობისთვის" - აღნიშნულია განცხადებაში.

"თავისუფალი დემოკრატების" ლიდერმა რამდენიმე დღის წინ ეროვნული უშიშროების საბჭოს დოკუმენტაცია მიაწოდა, რომელიც ალასანიას აზრით ადასტურებს, რომ დასავლეთ საქართველოში უკანონო შეიარაღებული ფორმირებები იქმნება.

ეროვნული უშიშროების საბჭოს აპარატმა ირაკლი ალასანიას მიმართვასთან დაკავშირებით განცხადება გაავრცელა.

"მოწოდებული მასალა არათუ არ შეიცავს რაიმე ღირებულ ინფორმაციას, მასში უბრალოდ ჩამოთვლილია მოქმედი სამხედრო მოსამსახურეებისა და პოლიციელების სახელები და გვარები, მათ შორის არიან საქართველოს შინაგან საქმეთა და თავდაცვის მინისტრები, პოლიციის რეგიონული დანაყოფების უფროსები, თავდაცვისა და შინაგან საქმეთა სამინისტროების მაღალი რანგის ოფიცრები. აღმაშფოთებელი და უპასუხისმგებლოა სამოქალაქო ომის ან სირიის ქალაქ ჰომსის მსგავსი ტრაგედიის წინასწარმეტყველება საქართველოში"- ნათქვამია ეროვნული უშიშროების საბჭოს ვებგვერდზე გამოქვეყნებულ განცხადებაში.