ფრაქცია "ერთობა სამართლიანობისთვის" თავმჯდომარე დიმიტრი ლორთქიფანიძემ პრემიერ-მინისტრს იმის გამო უსაყვედურა,  რომ იგი ბიძინა ივანიშვილისთვის მოქალაქეობის ჩამორთმევის საკითხზე ხმას არ იღებს.
ლორთქიფანიძემ გილაურთან ერთად, დიასპორის საკითხებში სახელმწიფო მინისტრი პაპუნა დავითაიაც გააკრიტიკა.
"პაპუნა დავითაია სიამაყით აცხადებდა ჩვენი თანამემამულეებისთვის სტატუსის მინიჭების საკითხს, რაც გარემოხმარების პიარ ელემენტია. ამ დროს, ღვაწლმოსილ მეცენატს, ადამიანს, რომელსაც ქართული კულტურის გადარჩენაში დიდი წვლილი მიუძღვის, საქართველოში დაბადებულს და მცხოვრებს საქართველოს მოქალაქეობა ჩამორთმეული აქვს. ამის შესახებ ბატონო პრემიერ–მინისტრო, არც კი აპირებთ ხმის ამოღებას" – მიმართა ლორთქიფანიძემ ნიკა გილაურს.
მისივე თქმით, მთავრობის მხრიდან წარმოდგენილი საკანონმდებლო აქტები ბიძინა ივანიშვილის წინააღმდეგ არის მიმართული და ამის მაგალითი რამდენიმე კანონში შეტანილი ცვლილებაა.