"თავისუფალი საქართველოს" წარმომადგენლები ხელისუფლების მხრიდან საგანმანათლებლო სისტემის დაფინანსების შემცირებას აპროტესტებენ.
პარტიის გენერალური მდივნის ალექსანდრე შალამბერიძის განცხადებით, რომელიც მან დღეს გამართულ ბრიფინგზე გააკეთა, ბიუჯეტში შეტანილი ცვლილებების თანახმად, მეცნიერებათა აკადემიას დაფინანსება 400 000 ლარით შეუმცირდა. "სათანადო დაფინანსების გარეშე კი მათემატიკის, ფსიქოლოგიის, მედიცინის და სხვა სამეცნიერო სკოლები მუშაობას ვერ განაგრძობს" - აღნიშნა მან.
"თავისუფალი საქართველოს" წარმომადგენლები მიიჩნევენ, რომ მხოლოდ ტურიზმის სფეროს გაძლიერება და ვირტუალური საავადმყოფოების მშენებლობა ქვეყანას ვერ განავითარებს.
"დამოუკიდებელ საქართველოში მეცნიერების სფეროს განვითარებას სათანადო ყურადღება არ ექცევა. აკადემია ვერ გამოსცემს სამეცნიერო ლიტერატურას, რადგან ხელისუფლება მიზანმიმართულად განაგრძობს ქართული ინტელექტუალური პოტენციალის ნგრევას" - აცხადებს შალამბერიძე.
პარტიის წარმომადგენლები ხელისუფლებისგან მეცნიერების სფეროს მიმართ დაფინანსების გაზრდას და ქართული სამეცნიერო სკოლების გადარჩენისკენ ქმედითი ნაბიჯების გადადგმას ითხოვენ.