ფეხბურთელი და საზოგადოებრივი მოძრაობა "ქართული ოცნების" წევრი კახა კალაძე მოძრაობის აქტივისტებს მხარდაჭერას ჰპირდება. ამასთან დაკავშირებიათ კალაძის სპეციალური მიმართვა სოციალურ ქსელ "ფეისბუქზე" ბიძინა ივანიშვილის ოფიციალურ გვერდზე გავრცელდა.
მისი თქმით, "ქართული ოცნების" მხარდამჭერთა "ყოვლად აბსურდულმა დაკითხვებმა" მასობრივი ხასიათი მიიღო.
"კანონს ამოფარებულ ჩინოვნიკთა გარკვეული ნაწილი მოქალაქეებზე ზეწოლას ახდენს. ყოველივე ეს ყოვლად დამამცირებლად - ადამიანთა გაშიშვლებითაც კი ხდება" - აცხადებს კალაძე.
მისი განცხადებით, "ისტერიაში ჩავარდნილი პრეზიდენტი" თავისი რეჟიმის განმტკიცებისთვის "ქართულ ოცნების" პროვოკაციებზე წამოგებას ცდილობს.
"მაგრამ ხელისუფლების ვერანაირი ხაფანგი ქართველ ხალხს ვერ გვაიძულებს, რომ არჩეული სამართლებრივი გზიდან გადავუხვიოთ. ჩვენ მთელი ქვეყნის მასშტაბით ჩვენს აქტივისტებს აუცილებლად დავიცავთ და არავითარ შემთხვევაში მათ მარტო რეჟიმთან ბრძოლაში არ დავტოვებთ" - აცხადებს კალაძე.
მისი თქმით, მოვა დრო, როდესაც აბსოლუტურად ყველა ჩინოვნიკი, რომელიც დამნაშავე და კანონდამრღვევია, დაისჯება.
"ქართველი ხალხის მუდმივ ტერორსა და ძალადობაში ყოფნას მოქმედ რეჟიმს არ შევარჩენთ. ქალაქებში, რაიონებში, დაბებსა თუ სოფლებში ჩვენი რიგები არა თუ ყოველდღიურად, არამედ საათობრივად იზრდება და მალე ერთ მუშტად შეკრული საქართველოს მოსახლეობა"ქართულ ოცნებას აიხდენს " - აღნიშნავს ფეხბურთელი.